Mwanasoshalaiti Vera Sidika amesifia sana chaguo la kujifungua kupitia njia ya upasuaji.
Kupitia ukurasa wake wa Instagram, Vera ambaye alijifungua mtoto wake wa kwanza kwa njia ya upasuaji takriban wiki tatu zilizopita amesema kwa sasa mbinu za upasuaji wa ujauzito almaarufu kama CS zimeendelea na kuboreshwa sana.
Mpenzi huyo wa mwanamuziki Brown Mauzo amedai kwamba hakuhisi uchungu wowote alipofanyiwa upasuaji na hata baada ya kujifungua.
"Nilisema sijahisi uchungu wowote tangu nilipofanyiwa upasuaji hadi wa leo lakini watu hawaniamini kwa sababu wamezoea mbinu mzee za CS ambazo kila mtu aliogopa. Tena wanadhani eti sote tunaenda kwa daktari na hospitali moja kwa hivyo wanatarajia uhisi uchungu kama wa waliohisi" Vera amesema.
Mwanasoshalaiti huyo mwenye umri wa miaka 32 amesema upasuaji ambao alifanyiwa haukumwathiri kwa namna yoyote.
Amesema kwamba baada ya kufanyiwa upasuaji hakuna yeyote aliyemchukulia kama mgonjwa kwa kuwa hakuwa na maumivu yoyote.
"Hakuna aliyenichukulia kama mgonjwa baada ya CS kwa kuwa nilikuwa tu kama kawaida yangu. Kwa wakati mwingine huwa natamani ningefanya kuwa mgonjwa ama nahisi uchungu ili nipewe huduma zaidi kama mtu mgonjwa na nihurumiwe... Nikiwa hospitalini nilikuwa napewa dawa za kutuliza uchungu zenye nguvu kila wakati kwa hivyo sikuhisi uchungu wowote. Hata niliweza kukaa chini kwa kitanda cha hospitali masaa machache baada ya upasuaji. Sikula chochote baada ya masaa 6-7. Nilichohisi ni kiu na walipunguza kiasi cha maji ambacho nilifaa kunywa" Alisema Vera.
