Mwanamuziki na mzalishaji tajika nchini Magix Enga amejitokeza kueleza kuwa madai ya kuwa mwanachama wa zamani wa Illuminati ambayo alitoa hapo awali yalikuwa ya kusaka kiki tu.
Kupitia ukurasa wake wa Instagram, Enga ameweka bayana kuwa yote aliyosema akiwa kwenye mahojiano na Presenter Ali yalikuwa mzaha tu wala sio ukweli kuhusu maisha na utajiri wake.
Msanii huyo amedhihirisha alitumia umaarufu ambao alipata kufuatia madai aliyotoa kuachilia vibao vitano kwenye Youtube channel yake na vimeendelea kutazamwa sana.
"Hii video ya kuchekesha bado inavuma vipi?? Inapeleka mzaha katika hatua nyingine. Hakuna njia fupi katika maisha haya , fanya bidii rafiki yangu na uombe. Lakini illuminati ni kweli kwa wale wanaoamini. Nilikuwa nikisikia kuwahusu pia kama nyinyi. Asanteni kwa kutazama. Nilitoa video 5 za muziki kwenye YouTube yangu" Enga alisema.
Baada ya kufanikiwa kuwadanganya Wakenya wengi, mzalishaji huyo amejipiga kifua kuwa mwigizaji mahiri na kuwasihi watu wamwache afanye mambo yake jinsi anavyotaka.
"Bado niko na miaka ishirini na kitu na nina nyimbo nyingi kubwa kwenye YouTube na nabaki kuwa mtayarishaji bora/Msanii bora Afrika. Unatarajia nini kama sio vichekesho tupu na muziki mzuri. Wacheni mtoto afanye mambo yake bila chuki." Enga amesema.
Hivi majuzi Magix Enga alijitokeza kudai alijiunga na Illuminati akiwa na umri wa miaka 23 na hivyo ndivyo aliweza kujinufaisha kiusanii.
Alidai kwamba bado anawindwa na wanachama wa kikundi hicho baada ya kugura alipotakiwa kutoa vitu ambavyo hangeweza.
