•Jemutai amewaonya wanawake dhidi ya kustareheka sana katika uhusiano na kufikiria kuwa wapenzi wao hawawezi kuwaacha.
•Pia alidai kuwa wanaume wanaelewa uhusiano bora kuliko wanawake na wanajua jinsi ya kukabiliana nao.
Mchekeshaji mashuhuri wa Kenya Stella Bunei Koitie almaarufu Jemutai amewaonya wanawake dhidi ya kustareheka sana katika uhusiano na kufikiria kuwa wapenzi wao hawawezi kuwaacha.
Katika video ambayo alishiriki kwenye ukurasa wake wa Instagram, mama huyo wa watoto wawili alionya kwamba hakuna hatua katika uhusiano ambayo inawahakikishia wapenzi kwamba hawataachana.
Jemutai alisema kuwa hata wapenzi wakiharibu hewa karibu na mwingine au kujisaidia mbele ya mwingine haitoi hakikisho lolote kwamba uhusiano huo utadumu.
“Lakini tutakuja kuchekeshana mji huu. Ati sasa mtu anasema, ati ooh ukiwa kwa mahusiano alafu aharibu hewa mbele yako hamuwezi achana, ati ooh mahali tumefikisha hatuwezi achana... ata hujafika kilele, yenye uko kwa choo unasugua meno yeye akiwa anajisaidia haja kubwa na mnapiga stori, na bado ataondoka. !” Mchekeshaji Jemutai alionya.
Aliendelea, “Dada, kushuta isifanye ufikirie huyo mtu ako hapo milele, hapana.”
Mchekeshaji huyo wa zamani wa Churchill Show alibainisha kuwa hakuna mwanamke aliye na ujuzi wa kutosha kuhusu mahusiano kuwa mkamilifu.
Pia alidai kuwa wanaume wanaelewa uhusiano bora kuliko wanawake na wanajua jinsi ya kukabiliana nao.
“Linapokuja suala la uhusiano dada, uwe mama umesoma uko na digrii ama uko na PhD uko na Masters, uko na diploma, ulimalizia class eight ama hukukanyaga shule,, hatua yoyote ya masomo uliofikia hapo awali unakubali kuwa linapokuja suala la mahusiano, sisi wote tuko shule ya chekeshea Play Group,” alisema.
"Kadiri mapema tunavyojifunza hatuwezi kuwapita wanaume werevu kwenye mchezo wa uhusiano, ndivyo inavyokuwa bora zaidi. Umeombwa msamaha mara ngapi mwaka huu? Na ukamsamehea.. Play Group!” angalia.
Hali ya sasa ya uhusiano wa Jemutai haiko wazi kwani kwa muda mrefu amekuwa akiweka masuala yake ya mapenzi kuwa ya faragha.
Takriban miaka mitatu iliyopita, alijitokeza kuzungumzia uhusiano wake na mchekeshaji mwenzake Herman Kago maarufu Profesa Hamo, ambaye ana watoto wawili.
Wawili hao walikuwa wamechumbiana tangu 2015 lakini kwa wakati fulani walitofautiana, ambapo Jemutai hata alimshutumu baba wa watoto wake kwa kuwatelekeza.