• “Waambie sijali Kach, wewe ni mtu wa ajabu sana na ninakubali upendo wako kwangu" - Brown alisema.
Image: Screengrab, Instagram
Otile Brown ameahidi kushiriki mtoko wa chakula cha jioni na shabiki wake ‘kienyeji’ baada ya video yake kusambaa akisema anatamani sana kukutana na msanii huyo wa kizazi kipya ambaye hayuko nchini kwa sasa.
Mrembo huyo kwa jina Kach alifanyiwa mahojiano na chaneli ya Mungai Eve na kuonesha matamanio na matumaini makubwa kukutana na Otile lakini alisema marafiki zake walimdhihaki vikali wakimuambia kwamba yeye ni ‘kienyeji’ na kukutana na msanii Otile ni sawa sawa na kujaribu kuvuka bahari kwa miguu peku.
Akijibu mahojiano ya Kach na Mungai Eve, ambapo alikiri kumpenda mwimbaji huyo na kuonyesha tattoo yake ya jina lake, Otile Brown alijitolea kumpeleka nje kwa kahawa akirudi kutoka safari ya London.
Katika video hiyo iliyosambazwa kwenye hadithi zake za Instagram, Kach alikuwa akieleza jinsi marafiki zake walivyomdhihaki kwa kuwa shabiki wa kutupwa na kumpotezea muda mtu ambaye hatawahi kumkubali.
“Wengine walinitusi, waliniambia Otile Brown hawezi taka kienyeji kama wewe, Otile hatakutafuta, unaharibu tu muda wako bure, nikasema tu ni sawa,” Kach alisema.
Otile Brown alikuwa mwepesi wa kujibu, akimwambia Kach asijali marafiki zake na kwamba alithamini upendo na kujitolea kwake.
“Waambie sijali Kach, wewe ni mtu wa ajabu sana na ninakubali upendo wako kwangu. Kienyeji huwa chenyewe. Kusema kweli nikija tutakuwa na mtoko wa chakula cha jioni na si kukutana kwa kahawa tu,” Brown alisema.
Kach amezidi kuonyesha mapenzi yake kwa Otile Brown, kwani sio tu ana tattoo ya jina lake bali pia ana tattoo ya pili ambayo bado hajaiweka wazi kwa mtu yeyote.
Tatoo ya pili ni ya jina la Otile kifuani mwake, na nyingine ya jina la kimajazi, Obizee, mkononi mwake. Amefikia hata kutumia picha ya Otile kama picha yake ya wasifu kwenye WhatsApp, akionyesha kujitolea kwake kwa mwimbaji huyo.