Mwelekezaji huyo maarufu wa video alifariki katika ajali mbaya ya barabarani iliyotokea katika barabara kuu ya Nairobi-- Naivasha ambayo pia iliwahusisha wasanii wengine kadhaa ambao walikuwa pamoja naye.
Mwimbaji wa nyimbo za injili na za mapenzi, Moses Tarus Omondi almaarufu Mr Seed ambaye alikuwa akisafiri pamoja na marehemu Ambose mnamo siku ya ajali aliugua majeraha mabaya na amekuwa akihudumiwa na wahudumu wa afya. Licha ya kujeruhiwa, msanii huyo wa zamani wa EMB ambaye alionekana kuwa na maumivu makali alijitahidi kabisa na kuhudhuria mazishi hayo ya Jumamosi.
Wakati wa maziko hayo, Mr Seed alionekana akihangaika kusimama na kutembea alipoombwa kuwasalimia waombolezaji. Pia alionekana akilia kwenye eneo la kaburi la marehemu baada ya kuzikwa shambani mwao.
Baadaye, kwenye ukurasa wake wa Instagram, alipakia picha yake akiwa amesimama kando ya jeneza la Ambrose na kueleza jinsi alivyoumizwa na kufariki kwa mshirika wake wa karibu.
Wakati huohuo, aliwafahamisha mashabiki wake kuwa atachukua mapumziko kutoka kwenye mitandao ya kijamii kwa muda ambao haujawekwa wazi ili kuangazia afya yake ya mwili na ya kiakili.
"Ninatoka kwenye mitandao ya kijamii kwa muda, nahitaji kujishughulisha na afya yangu/akili yangu. Nitarudi hivi karibuni. Baraka. Nawapenda mashabiki wangu, tuonane hivi karibuni," aliandika kwenye Instastori zake.
