Ed Sheeran kucheza kibao kipya katika Tamasha la Euro

Mwanamuziki wa nyimbo za pop, Ed Sheeran ametangaza kuwa atacheza kwenye tamasha ya Tiktok UEFA EURO 2020 usiku wa Juni 25.

Tamasha hilo litafanyika nyumbani mwa msanii huyo maeneo ya Portman Road mjini Ipswich, Uingereza na  kuonyeshwa bure kupitia mtandao wa TikTok.

Ed Sheeran alitoa tangazo hilo siku ya Ijumaa akisaidiana na aliyekuwa mchezaji wa klabu ya Manchester United na ambaye ni mmiliki wa klabu ya Inter Miami David Beckham.

Sheeran pia  atakuwa akizindua kibao kipya kwenye tamasha hiyo.

“Siwezi ngoja kucheza katika tamasha la TikTok UEFA EURO 2020 kutoka Portman Road. Ni mahali napenda na natazamia sana kucheza ngoma kadhaa ambazo mashabiki wanapenda na pia kibao change kipya kwa mara ya kwanza “ Sheeran alisema.

Kampuni ya TikTok ilitangazwa kuwa mdhamini wa kwanza wa kombe la EURO 2020 mapema mwaka huu.

Kombe hilo ambalo lilifaa kuchezwa mwaka jana liliahihirishwa kutokana na  janga la Corona.

Mechi ya kwanza kwenye kombe hilo itakuwa kati ya Uturuki na Italia tarehe 11 Juni huku fainali ikitarajiwa kuchezwa tarehe 11 mwezi wa Julai.