Ndege ya KDF yaanguka Baringo

Ndege ya Kenya Airforce iliyokuwa na abiria imeanguka dakika chache baada ya kupaa katika eneo la Bonde la Ufa.

Katika taarifa iliyotolewa Alhamisi, Julai 20, Vikosi vya Ulinzi vya Kenya vilithibitisha kuwa wafanyakazi na abiria wote waliokuwa ndani ya ndege hiyo walinusurika.

Abiria hao walikuwa wakielekea Nairobi kutoka kazini wakati chopa hiyo ilipopata changamoto za kiufundi na kuanguka.

Iliripotiwa kuwa chopa hiyo ya kijeshi, iliyotambuliwa kama helikopta ya Fennec, haikuchukua muda mrefu angani baada ya kupaa.

"Jioni ya leo, helikopta ya Jeshi la Wanahewa la Kenya, Fennec, ilipokuwa ikiruka kutoka uwanja wa Chemlingot kuelekea Nairobi, iligonga mti na kuanguka," KDF ilisema.

Vikosi vya Ulinzi vya Kenya pia viliwahakikishia wananchi kwamba wafanyakazi wao watapata ahueni kamili kwa vile waliohusika katika ajali hiyo walikuwa wakipata matibabu ya kutosha.

"Abiria wote walishuka salama na wako katika hali shwari," Jeshi la Ulinzi la Kenya lilithibitisha katika taarifa iliyotumwa kwa vyumba vya habari.