Mamlaka ya Viwanja vya Ndege nchini Kenya (KAA) imetangaza kufungwa kwa njia za kupaa za ndege katika Uwanja wa Ndege wa Kimataifa wa Jomo Kenyatta (JKIA) jijini Nairobi mnamo Jumanne, Juni 11, kupitia chapisho kwenye mtandao wao wa kijamii wa X saa 1:47 adhuhuri.
Katika taarifa hiyo fupi, mamlaka hiyo ilihusisha kufungwa kwa ndege hiyo mbovu iliyotua kwenye njia ya kurukia ndege mapema Jumanne.
Baada ya kuthibitisha kisa hicho, KAA ilisema kuwa hakuna majeruhi walioripotiwa na kwamba kuondolewa kwa ndege hiyo kwenye njia ya kurukia kunaendelea.
Abiria walioathiriwa waliombwa kuwa watulivu huku mamlaka ikiendelea kurejesha huduma za kawaida katika uwanja wa ndege.
“Tukio hili limesababisha kufungwa kwa njia ya kurukia ndege katika JKIA. Hakuna majeraha yaliyoripotiwa. Uondoaji wa ndege hiyo kwenye njia ya kutua kunaendelea," KAA ilibainisha katika taarifa.
"Tunaomba radhi kwa usumbufu wowote uliojitokeza na tutatoa sasisho hivi karibuni," iliongeza.
Tukio hili linamaanisha kwamba, ndege hazitaweza kufikia mojawapo ya viwanja vya ndege vikubwa zaidi barani Afrika mpaka ndege hiyo iondolewe.
Si mara ya kwanza kwa njia ya ndege ya JKIA kusimamishwa. Imefungwa kwa muda, katika hali inayofanana mnamo Aprili mwaka jana.
KAA ilifunga njia ya kurukia ndege baada ya ndege ya mizigo kuacha kuruka kutokana na matatizo ya kiufundi. Katika taarifa yake, ilibainika kuwa, ndege hiyo ya mizigo ilipata hitilafu wakati ikijaribu kupaa na hivyo kuziba njia ya kurukia ndege.
Kufuatia tukio hilo, mamlaka iliwashauri abiria kushauriana na mashirika yao ya ndege kwa maelekezo zaidi.
“Kipaumbele chetu kikuu ni usalama wa abiria wote na tunashirikiana kwa karibu na mamlaka husika kutatua hali hii haraka na kwa usalama iwezekanavyo," taarifa ya KAA ilisema.
“Tunasikitika usumbufu wowote unaoweza kusababishwa na kuthamini uvumilivu na uelewano wenu wakati huu. Tunawashauri abiria wote kuwasiliana na mashirika yao ya ndege kwa taarifa zaidi kuhusu hali ya safari zao," KAA iliongeza.
© Radio Jambo 2024. All rights reserved