Kalonzo akashifu Serikali kuhusu bajeti ya 2024/2025

Azimio La Umoja mnamo Ijumaa iliikashifu serikali kuhusu bajeti yake iliyopendekezwa ya 2024/2025, ikiitaja kuwa potofu.

Huku akilaani tangazo la bajeti ya Hazina ya Kitaifa, mkuu wa Azimio Kalonzo Musyoka alitoa wito kwa jumuiya ya kimataifa kuingilia kati.

Kiongozi huyo wa chama cha Wiper pia aliwataka Wakenya walioko ughaibuni kuungana na wananchi wenzao kukashifu ugawaji wa bajeti wa hivi majuzi, akisema mgao huo haujatanguliza mahitaji ya Wakenya.

"Kutokana na makosa haya makubwa, sisi kama muungano tunahimiza jumuiya ya kimataifa, na mashirika ya kiraia kusimama katika mshikamano na Wakenya," Kalonzo alitoa maoni.

"Pia tunawasihi raia wanaohusika ndani na nje ya nchi kusaidia katika kulaani utawala wa Kenya Kwanza wa kutojali manufaa ya umma," aliongeza.

Aidha Azimio iliwaagiza Wabunge wote wanaounda muungano huo kuongoza kutoka mbele kuukataa Muswada wa Sheria ya Fedha unaotarajiwa kuwasilishwa bungeni wiki ijayo.

Kalonzo pia aliripoti zaidi ya Ksh1 trilioni katika mgao wa bajeti, akiita mgao usiofaa.

"Hazina ya Kitaifa ina Ksh26 bilioni zaidi kwa jina la maendeleo, na Idara ya Jimbo la Ugatuzi ina ongezeko la Ksh2.6 bilioni za matumizi ya maendeleo," Kalonzo alifichua.

"Idara ya Serikali ya Makazi pia imetengewa Ksh72B ya ziada ambayo ni ya juu zaidi ya ile ya kaunti 10 kwa pamoja."

Serikali pia ililaumiwa kwa kushindwa kila mara kushughulikia masaibu ya Wakenya na kwamba ushuru wa adhabu ungeiingiza nchi katika mtanziko wa kiuchumi.

"Wakenya wanapaswa kuamini nini? Huu ni mwendelezo wa utamaduni wa Kenya Kwanza wa uwongo. Utawala wa Kenya Kwanza unashindwa kushughulikia maswala ya watu," Kalonzo Musyoka alihoji.

Tangazo la Azimio linakuja siku moja tu baada ya Hazina ya Kitaifa kuwasilisha pendekezo lake la bajeti ya 2024/2025 kwa Bunge ili kuidhinishwa.