Seneta Khalwale amshauri Ruto kuvunja baraza la Mawaziri

Baadhi ya maseneta wanamtaka Rais William Ruto kuvunja baraza lake la mawaziri wakidai kuwa baadhi ya mawaziri ndio chanzo cha matatizo yanayokumba nchi. 

Wakiongozwa na Seneta wa Kakamega Boni Khalwale, maseneta hao wametoa wito wa kuondolewa kwa afisi ya mkuu wa Waziri, inayoshikiliwa na Musalia Mudavadi, miongoni mwa mapendekezo mengine.

Akihutubia Seneti Jumatano, Julai 3, Khalwale, mwanachama mashuhuri wa Muungano wa Kidemokrasia (UDA), alikosoa kujumuishwa kwa ofisi kama zile za wanawake wa kwanza na wa pili nje ya mipaka ya kikatiba.

Alimsihi Rais Ruto kuvunja na kuunda upya baraza zima la mawaziri, akisisitiza, "Bwana Rais, vunja na uunde upya Baraza la Mawaziri. Vunja afisi kama vile Waziri Mkuu wa Baraza la Mawaziri ambazo hazijaidhinishwa kikatiba nchini Kenya."

Seneta Enoch Wambua alikariri maoni haya, akipendekeza kupunguzwa kwa idadi ya makatibu wa baraza la mawaziri kutoka 21 hadi 14, akitaja matumizi yasiyo endelevu ya serikali. 

“Kama onyesho la kusikiliza kero za wananchi, punguza idadi ya makatibu wa baraza la mawaziri hadi 14,” akahimiza wakati wa kikao cha Seneti.

“Kwa nini tunahitaji Makatibu wa Baraza la Mawaziri 21 kwa idadi ya watu chini ya milioni 60, hasa wenye uchumi ambao hauwezi kuhimili matumizi hayo?" Aliuliza Wambua.

Katika hatua ya awali Jumapili, Rais Ruto alitangaza hatua kali za kubana matumizi, ikiwa ni pamoja na kusimamisha ufadhili wa afisi za Mke wa Rais na mke wa Naibu Rais kuanzia Julai 1, 2024. 

Zaidi ya hayo, alitangaza kusitisha uteuzi wa Makatibu Wakuu (CASs) na kuapa kupiga marufuku kuhusika kwa wanasiasa kwenye michango nchini , kufuatia hisia zilizoenea dhidi ya matumizi mabaya ya mali ya umma serikalini.

“Ninaelewa hisia za umma dhidi ya kudumisha afisi kama zile za wanawake wa kwanza na wa pili," Ruto alisema wakati wa mahojiano ya moja kwa moja na wanahabari. 

"Katika kukabiliana na changamoto zetu za sasa, lazima tuishi kulingana na uwezo wetu kwa hivyo, ofisi hizi hazitafadhiliwa tena," alisisitiza.

Matangazo ya Ruto yanakuja huku kukiwa na ongezeko la maandamano na ubatilishaji wa hivi majuzi wa Mswada wa Fedha wa 2024, ulionuiwa kuongoza ukusanyaji wa mapato na matumizi ya serikali. 

Wakati wa mahojiano hayo, Ruto alieleza kuwa yupo tayari kushirikisha vijana wa Kenya kwenye majukwaa mbalimbali, akikiri mzozo wa taifa huku akikwepa maswali kuhusu naibu wake, Rigathi Gachagua, na kukiri kuwa baraza lake la mawaziri "lingeweza kufanya vyema."

Rais pia aliahidi kupunguza bajeti ya ofisi yake, akiahidi kuwa akiba hiyo itafaidi idara zingine za serikali. Hata hivyo, Rais sasa anakabiliwa na shinikizo zaidi la kujiuzulu kutoka ka vijana.