Moses Kuria awataka majaji kutomrejesha Gachagua uongozini baada ya kutimuliwa

Saa chache baada ya aliyekuwa naibu rais Rigathi Gachagua kuhutubia wanahabari akiomba rais William Ruto asimwangamize pamoja na familia yake, mshauri mkuu wa masuala ya kiuchumi katika serikali ya Kenya Kwanza Moses Kuria, ameonekana kutoa maoni yanayolenga kumjibu Gachagua.

Kupitia ukurasa wake wa X, Moses Kuria amewataka majaji kutotoa uamuzi wa kumrejesha Gachagua mamlakani akitumia lugha ya kimafumbo kueleza hayo.

“Majaji wapendwa, mke amesema maisha yakeyako hatarini. Kwamba mume wake alijaribu kumpa umu mara mbili. Kwa nini mhatarishe maisha yake kwa kumrudisha kwenye njia ya madhara?’  Aliuliza aliyekuwa waziri Moses Kuria.

Alipokuwa akitoka hospitalini Jumapili tarehe 20, Gachagua alifichua kuwa katika ziara ya serikali kwenye kaunti ya Kisumu, maafisa kutoka vyombo vya usalama vya siri waliingia kwenye chumba chake na kutia sumu kwenye chakula chake.

Naibu rais huyo wa zamani aliongeza kusema kuwa, tukio sawia na hilo lilitukia katika kaunti ya Nyeri ambapo alikiri kwamba timu nyingine kutoka idara ya upelelezi ya taifa NIS ilijaribu kutia sumu kwenye chakula alichokuwa ameandaliwa na baraza la wazee wa Kikuyu.

Mkuu wa ushauri wa maswala ya kiuchumu amewataka majaji kufanya uamuzi wa kumwondoa Gachagua akisema kuwa kufanywa hivyo itakuwa kwa usalama wake.

Kuria aidha amesema kuwa kile ambacho Mungu amekitenganisha, kusiwepo hakimu wa kukirejesha pamoja.

Haya yote yanajiri wakati ambapo mahakama ya juu mnamo Ijumaa 18 kutoa uamuzi wa kusitishwa uapishaji wa naibu rais mteule Kithure Kindiki aliyeidhinishwa na bunge la kitaifa kwa wingi wa kura 236.