Zaidi ya watu 20 wachomwa moto wakiwa kwenye basi, Nigeria

Muhtasari
  • Walikuwa wakisafiri kutoka mji wa Sabon Birni hadi mji wa Isa karibu na mpaka na Niger

Takriban abiria 21, wakiwemo watoto, waliteketea moto hadi kufa wakati basi lao lilipovamiwa na watu wenye silaha katika jimbo la Sokoto, kaskazini-magharibi mwa Nigeria, polisi walisema.

Walikuwa wakisafiri kutoka mji wa Sabon Birni hadi mji wa Isa karibu na mpaka na Niger.

Msemaji wa polisi Sanusi Abubakar aliiambia BBC kwamba wengine kadhaa wanapata matibabu hospitalini kutokana na majeraha ya moto.

Baadhi ya ripoti zinaonesha kuwa idadi ya waliouawa ni karibu 30.

Mmoja wa waliohusika katika kuwasaidia majeruhi alielezea tukio hilo kuwa la "kuogofya" na kwamba wengi wa waathiriwa walishambuliwa kiasi cha kutotambulika.

Shambulio hilo lilitokea Jumatatu jioni lakini taarifa zimepatikana kwa kuchelewa kutokana na huduma duni za mawasiliano katika eneo hilo.

Baadhi ya ripoti zinasema washambuliaji walichoma gari hilo kwa maksudi na kuwachoma watu waliokuwa ndani huku akaunti nyingine ikionesha moto huo uliwashwa kwenye basi hilo kutokana na milio ya risasi ya washambuliaji.

Polisi wanasema wanachunguza mazingira ya shambulio hilo.

Kuwachoma abiria wakiwa hai ndani ya gari lao na watu wenye silaha si jambo la kawaida katika eneo hilo.

Ni mbinu ambayo kwa kawaida hutumika na kundi la wanamgambo la Boko Haram ambalo huendesha shughuli zake zaidi kaskazini mashariki mwa Nigeria.