Siku ya Jumapili mamia ya waendesha pikipiki waliandamana kutoka jijini hadi Kitengela kulalamikia mauaji ya vijana wanne waliopoteza maisha yao mikononi mwa wafugaji waliowashuku kuwa wezi wa mifugo usiku wa Jumapili, Agosti 8.
Kikundi hicho ambacho kiliandamana na baadhi ya wanafamilia wa vijana wanne walioangamia kilifululiza moja kwa moja hadi kituo cha polisi cha Kitengela kikidai kupata majibu kuhusiana na mkasa huo.
Wakiwa wamebeba mabango makubwa yenye picha za vijana waliouliwa na kuandikwa jumbe za kulaani mauaji ya kiholela kutokana na mitindo ya maisha ya watu, wanachama wa chama cha waendesha bodaboda waliandamana katika barabara ya Mombasa na ile ya kuelekea Kitengela wakiomboleza wenzao.
Ombi kuu la waandamanaji hao lilikuwa haki itendeke na waliotekeleza mauaji yale watiwe mbaroni.
Alipokuwa anahutubia waandamanaji waliokuwa wamejumuika, kiongozi wa chama hicho Sammy Kiumbe alilaani mauji dhidi ya waendesha pikipiki wa kibinafsi na kusema kuwa hawakuweza kupata majibu kamili kuhusu uchunguzi unaoendelea kwani bosi wa polisi katika kituo cha Kitengela hakuwepo.
"Hatutakubali kuendelea kuuliwa na ndio sababu tumekuja hapa leo pamoja na familia kuskia kuhusu hiyo kesi hiyo inaendeleaje. Vijana wamepelekwa kwenye eneo la tukio na polisi wanafanya kazi yao. Tulikuwa tumekuja kuambiwa vile kesi inaendelea lakini tumeambiwa kuwa OCPD ako Isinya na siku ya leo sio siku tungeweza kumuona. Tumeembiwa kuwa hatukuwa tumewaarifu sababu hakuwa kazini na hakuna mtu mwingine ambaye ana cheo ndogo ambaye anaweza kumwakilisha OCPD" Kiumbe alisema.
