Kenya na Urusi zinajitahidi kuanzisha Kikundi cha Urafiki cha Bunge kwa madhumuni ya kuimarisha Diplomasia ya Bunge.
Haya yalibainika kufuatia mkutano kati ya Spika wa Bunge la Kitaifa Moses Wetang'ula na Balozi wa Urusi nchini Kenya Dmitry Maksimychev.
"Tulijadili masuala ya maendeleo ya kijamii na kisiasa yanayogusa nchi hizi mbili," Wetang'ula alisema.
"Tumekubali kuweka utaratibu wa kuanzisha Kikundi cha Urafiki cha Wabunge wa Kenya na Urusi kwa madhumuni ya kuimarisha Diplomasia ya Bunge."
Kenya na Urusi zimekuwa na uhusiano wa kidiplomasia tangu Desemba 14, 1963, na tangu wakati huo zimedumisha uhusiano mzuri.
Urusi ilikuwa nchi ya kwanza kufungua ubalozi Nairobi.
Nchi hizo mbili, hata hivyo, zilitilia shaka kila mmoja katika kipindi cha Vita Baridi.
Katika taarifa yake kwenye ukurasa wake wa Twitter, Wetang'ula alisema aliitaka Urusi kushirikisha Kenya katika sekta mbalimbali za maendeleo zikiwemo utalii, uchukuzi na teknolojia miongoni mwa sekta nyinginezo.
"Nimemwalika Spika mwenzangu wa Bunge la Shirikisho la Urusi kuzuru Kenya kwa majadiliano zaidi kuhusu mazungumzo ya Bunge," spika alisema.
