Afisa wa polisi mafichoni baada ya kudaiwa kumdunga kisu mkewe Siaya

Afisa wa polisi anayehusishwa na Kitengo muhimu cha Ulinzi wa Miundombinu (CIPU) amejificha baada ya kudaiwa kumdunga kisu mkewe kufuatia ugomvi wa kinyumbani Jumatatu usiku.

Kisa hicho ambacho kilimwacha mkewe, 25, kulazwa katika Hospitali ya Misheni ya Lwak kilifanyika katika nyumba za makazi za Kalandini KeNHA katika kaunti ndogo ya Rarieda ambazo zinakaliwa na maafisa wa CIPU.

Kulingana na kamanda wa polisi kaunti ya Siaya Cleti Kimaiyo, afisa huyo wa CIPU alizua ugomvi na mkewe na kumdunga  kisu upande wa kushoto wa tumbo kabla ya kutoweka gizani.

Kimaiyo alisema maofisa wengine wanaoishi ndani ya jengo hilo waliitikia wito wa mkewe na kumkimbiza haraka katika Hospitali ya Misheni ya Lwak ambako amelazwa kwa sasa.

Kimaiyo alifichua kuwa uchunguzi kuhusu tukio hilo umeanzishwa na DCIO wa eneo hilo ambao tayari wameshughulikia eneo la tukio na kuongeza kuwa afisa huyo anayekimbia atasakwa hivi karibuni.

Mkuu wa polisi wa kaunti hiyo alifichua kuwa mwathiriwa yuko katika hali nzuri katika hospitali ya misheni ya Lwak.