Jitihada mpya na za dharura zimeanza kufanywa ili kumaliza tofauti kati ya rais Uhuru kenyatta na naibu wake William Ruto huku jamii ya kimataifa ikizua hofu kuhusu kupanda kwa joto la kisiasa .
Maelezo kuhusu juhudi hizo za kuwapatanisha yametolewa siku chache baada ya hafla ya maombi ya kitaifa siku ya Jumamosi ambapo tofauti kati ya viongozi hao zilidhihirika.
Itifiki ilipuuzwa huku kila mmoja akiondoka kupitia njia tofauti. Septemba tarehe 28 Ruto alikosa kuhudhuria kongamano la kitaifa la Covid 19 ishara kwamba uhusiano wake na mkuu wake umezorota sana.
Duru zaarifu kwamba kundi moja la viongozi wa kidini wenye ushawishi mkubwa limekutana na rais na naibu wake kando kando na wawili hao walitarajiwa kuandaa kikao na wanahabari ili kutangaza kusitisha uhasama na ‘bifu’ iliyopo kati ya kambi zao za kisiasa .
Viongozi hao wa kidini walikutana na rais Kenyatta Alhamisi wiki iliyopita. Rais inadaiwa alihamakishwa na matusi ambayo washirika wa Ruto wanamwelekezea pamoja na familia yake miongoni mwa masuala mengine .
Wiki jana binamu yake rais Uhuru Beth Mugo alimhusisha Ruto na mashambulizi hayo akisema naibu wa rais hakujitokeza wazi kulaani vitendo vya washirika wake wa kisiasa.
“…Kwa sababu nahodha wao wa kisiasa naibu wa rais hajajitokeza kulaani matusi ya washirika wake dhidi ya rais Kenyatta, ni ishara tosha. Je, yamaanisha kwamba DP anaunga mkono matamshi ya viongozi hawa?’ Mugo aliuliza.
Siku ya Jumatatu kundi la viongozi wa kidini lilifanya mkutano uliodumu saa tano na naibu wa rais Ruto katika makazi yake rasmi ya Karen.
Duru katika afisi ya Ruto zasema kundi hilo liliongozwa na Askofu mkuu wa Nyeri Anthony Muheria na kuwahusisha wengine kama askofu mstaafu wa AIC Silas Yego na askofu wa CITAM David Oginde.
Kwa sababu ya mkutano huo Ruto alilazimika kusafiri kwa ndege kutoka nyumbani kwake Sugoi huko Uasin Gishu ili kurejea jijini baada ya kuwaalika nyumbani kwake viongoz kutoka Nyanza siku hiyo.
(Mhariri Davis Ojiambo)
