Maamlaka ya kusimamia jiji la Nairobi imepata pigo baada ya waziri wa fedha Ukur Yatani kudinda kutoa pesa za kuwalipa wafanyikazi zaidi ya 6000 waliotumwa kuifanyia kazi .
Waziri Yattani amesema hakuna sheria inayohalalisha kutolewa kwa fedha za kuwalipa wafanyikazi hao akisema fedha hizo zinaweza tu kutolewa kupitia serikali ya kaunti ya Nairobi kupitia hazina ya mapato ya kaunti .
Katika barua ilioandikwa kwa mkuu wa NMS Mohammed Badi waziri Yatani amesema kila kaunti inastahili kupewa fedha kupitia hazina ya mapato kwa kaunti na itakuwa ukiukaji wa sheria kwa NMS kupewa fedha moja kwa moja kutoka kwa hazina ya kitaifa .
Kando na utata huo wa fedha waziri Yattani amesema anagojea maelekezo kutoka kwa mkuu wa sheria kuhusu hatua zinazofaa kuchukuliwa .
