Gavana wa Machakos Alfred Mutua ameomba radhi kufuatia habari za uwongo alizochapisha hapo awali kuhusu kifo cha mke wa kiongozi wa Chama cha Wiper Kalonzo Musyoka.
Mgombeaji huyo wa kiti cha urais katika chaguzi za mwezi Agosti amesema alipotoshwa na watu kadhaa walio karibu sana na Kalonzo.
Kupitia kurasa zake za mitandao ya kijamii, Mutua amesema habari alizopewa kuhusu hali ilivyo katika familia ya Kalonzo zilionekana kuwa za kweli.
"Ningependa kuomba radhi kwa chapisho la awali kuhusu familia ya H.E. Kalonzo Musyoka. Haya yalitokana na taarifa potofu na ulaghai kutoka kwa watu kadhaa, wengine, wakionekana kuwa wa kuaminika na wa karibu na H.E. Kalonzo, ambao walifanya ionekane kama ujumbe kwangu kuhusu familia yake" Mutua amesema.
Gavana huyo ameomba radhi kwa kusababisha wasiwasi huku akilaani waliompatia habari hizo potofu.
Hapo awali Mutua alitumia kurasa zake za mitandao ya kijamii kufariji familia ya Kalonzo kufuatia 'kifo' cha Bi Pauline Kalonzo, jumbe ambazo alifuta dakika chacha baadae kabla ya kuomba msamaha.
Mutua alikuwa amemwomboleza Mama Pauline kama mwanamke mtulivu na aliye na sifa nzuri za mama.
