Wikendi iliyotamatika mashindano ya kandanda ambayo yanatazamwa zaidi duniani ya EPL yaliweza kurejea baada ya kipindi cha wiki mbili cha mapumziko ya kimataifa.
Michuano hiyo iliingia katika raundi ya nane siku ya Jumamosi huku mechi ya ufunguzi ikiwa kati ya Watford na washindi wa kombe la EPL msimu wa 2019/20 Liverpool ambayo ilichezwa mida ya saa nane unusu alasiri.
Vijana wa Klopp walionyesha wenyeji wao kivumbi ugani Vicarage Road kwa kuwalaza mabao matano bila jawabu. Roberto Firmino (3), Sadio Mane na Mohammed Salah ndio walifungia Liverpool na kuwawezessha kupata ushindi huo mkubwa.
Jumla ya mechi tano zilichezwa saa kumi na moja jioni.
Mechi ya kusisimua zaidi ilikuwa kati ya Leicester na Manchester United ambayo ilichezewa ugani King Power.
Mashetani wekundu walinyolewa kichwa bila maji na wenyeji wao Leicester ambao waliwanyuka mabao 4-2 na kupunguza kasi yao ya kuwania kombe la msimu huu. Mabao ya Leicester yalifungwa na Youri Tielemans. Caglar Soyuncu, Jamie Vardy na Patson Daka huku washambulizi Mason Greenwood na Marcus Rashford wakifungia United mabao mawili ya kufutia machozi.
Mechi nyingine ilikuwa kati ya washindi wa EPL 2020/21 Manchester City na Burnley. Bernardo Silva na Kevin De Bruyne walifungia City na kuwawezesha kupata ushindi wa 2-0 dhidi ya wenyeji wao.
Aston Villa walipoteza 2-3 nyumbani dhidi ya Wolves, Southampton wakawabwaga chini Leeds 1-0 hukumechi kati ya Norwich na Brighton ikiisha sare tasa.
Mechi ya mwisho siku ya Jumamosi ilikuwa kati ya Brentford na Chelsea ambayo ilichezwa saa moja unusu usiku ugani Brentford Community Stadium.
Vijana wa Tuchel walipata ushindi wa 1-0, beki Ben Chilwell akifunga bao la pekee la mechi hiyo katika dakika ya 45 na kuwasukuma hadi nafassi ya kwanza.
Mechi mbili tu zilichezwa siku ya Ijumaa.
