Shirikisho la soka duniani FIFA, na Shirikisho la Soka la Kenya zimeungana kuzipa vilabu vya Ligi Kuu ya FKF warsha ya siku mbili ya ngazi ya juu ya usimamizi na utaalamu wa vilabu vya FIFA.
Mameneja na Wakurugenzi wakuu wote wa vilabu vya Ligi Kuu ya Kenya watakuwepo kwenye warsha hiyo, ambayo inalenga kuzipa klabu za soka za humu nchini ujuzi wa usimamizi wa fedha, utawala bora na mipango ya kimkakati.
Warsha hiyo, ambayo ni toleo la Kiafrika la Mpango wa Utaalam wa FIFA na Usimamizi wa Klabu, itafanyika Nairobi kuanzia Jumatatu, Oktoba 28 hadi Jumanne, Oktoba 29.
Wataalamu wenye uzoefu wa hali ya juu wa FIFA wataongoza vikao hivyo, vikishughulikia vipengele muhimu vya maisha ya klabu.
Wazungumzaji mashuhuri ni pamoja na meneja mkuu wa kandanda kitaaluma wa FIFA Marcos Picalló Aguilar, Mshauri wa FIFA Pedro Correia, mkurugenzi wa huduma za biashara za michezo wa N3xt Marcos Pelegrin, na Javier Sobrino (mshirika mkuu wa zamani wa Aser Ventures).
Pedro Correia, Marcos Pelegrin, na Javier Sobrino wataongoza washiriki kupitia upangaji wa kimkakati siku ya kwanza.
Pelegrin atajadili usimamizi wa fedha wa klabu siku ya Jumanne, huku Correia akitoa mada kuhusu taratibu za utawala bora kwa timu za soka.
Warsha hii ni hatua inayolenga kusaidia vilabu vya Kenya kuwa endelevu kifedha na kufikia viwango vya kimataifa.
FIFA inaendelea kuunga mkono vyama vya wanachama wa Kiafrika katika kuimarisha ligi na vilabu vyao vya ndani, na toleo hili linakuja baada ya tukio kama hilo huko Angola mnamo Julai.
Wasimamizi wa klabu watapata ujuzi mpya, maarifa muhimu na fursa za kushiriki mbinu bora na wataalamu katika sekta hii kutokana na mpango wa FIFA.
© Radio Jambo 2024. All rights reserved