Kalonzo, Karua na Moi ni miongoni mwa 7 wanaotaka kuwa mgombea mwenza wa Raila

Jopo la wajumbe saba la uteuzi wa mgombea mwenza wa Azimio- One Kenya limehitimisha awamu ya kwanza ya uhakiki na kuorodhesha wagombea saba.

Kiongozi wa Wiper Kalonzo Musyoka na mwenzake wa Nark Kenya Martha Karua na gavana wa Mombasa Hassan Joho ni miongoni mwa walioteuliwa.

Wengine ni Mwakilishi wa Wanawake wa Muranga, Sabina Chege, Peter Kenneth, mwenyekiti wa Kanu Gideon Moi na Stephen Tarus wa National Liberty Party.

Katika sasisho lake mnamo Ijumaa, mwenyekiti wa jopo la uteuzi Noah Wekesa alisema walipokea maombi 20.

"Waombaji wengine 13 hawakuzingatiwa kwa vile hawakuwa wamewasilishwa na vyama vya kisiasa vya Muungano wa Azimio la Umoja One Kenya," Wekesa alisema.