Katika kitengo cha Patanisho, Mary Waithera (23) kutoka Nakuru alituma ujumbe akiomba kupatanishwa na mzazi mwenzake, Ibrahim Kimani.
Waithera alisema ndoa yake na Kimani ilisambaratika mwezi Agosti mwaka jana kufuatia mzozo wa kinyumbani. Wakati wa kutengana kwao, Waithera alikuwa na ujauzito wa miezi saba ambao ulichangia wao kuachana.
"Nilikuwa na ujauzito wa miezi saba alafu nikapatwa na uchungu wa leba. Kumwambia alisema yeye sio daktari," Waithera alisema.
Waithera alisema baadaye alijifungua mtoto wa kiume akiwa nyumbani kwao na kwa sasa mwanawe yuko na miezi mitano
"Hapo awali tulikuwa tunaongea na yeye. Lakini wiki iliyopita nilimpigia nikapata ameniblock.. Nilipata mimba nikiwa nyumbani kwetu. Alinioa nikiwa na mimba ya miezi tano. Mimba ni yake," alisema
Aliongeza, "Mama yake aliniambia niende nyumbani. Lakini yeye huwa anaenda kazi, nilijua nitapata nyumba ikiwa imefungwa,."
Mwanadada huyo alibainisha kuwa hajawahi kupokea taarifa zozote za mzazi huyo mwenzake kuoa mwanamke mwingine.
"Hata hajamuona mtoto wala kumshughulikia. Anasema ati nimpelekee mtoto akae na yeye," Waithera alisema.
Kimani alipopigiwa simu aliweka wazi kwamba hana shida yoyote na mzazi huyo mwenzake kurudi nyumbani.
"Hakuna shida, si ni kurudi tu," alisema.
Alibainisha kuwa hana tatizo lolote na mke huyo wake na kudokeza kwamba hata amewahi kumwagiza arudi.
"Mimi sijakataa arudi. Mimi sina shida na yeye.Huwa namwambia akuje alafu anaanza kuleta vituko. Huwa ananiambia ati ako mbali. Ata sijui mtoto anaitwa nani," Kimani alisema.
Ingawa hajawahi kumuona mwanawe, Kimani hata hivyo aliweka wazi kuwa mzazi huyo mwenzake hajamzuia kumuona.
Waithera alifichua kwamba alipatwa na wasiwasi baada ya Kimani kumwambia kwamba anataka kuoa mke mwingine.
Gidi alifanikiwa kuwapatanisha wawili hao na Kimani akakubali mke huyo wake arudi nyumbani.
