Mustafa aomba msaada tena ili kumalizana na tatizo la afya ya mama, "Nahitaji kama 1.5m"

Msanii mkongwe kutoka humu nchini Colonel Mustafa ameibuka akidai kwamba angalau ameanza kuona mwanga mwisho wa handaki katika suala zima la afya ya mama yake.

Ikumbukwe wiki kadhaa zilizopita baada yake kuonekana akiwa anafanya kazi ngumu ya mikono, wengi walimhurumia na kujitokeza kwa wingi kumpa msaada wa kifedha, haswa aluipofichua kwamba alilazimika kufanya mjengo ili kumhudumia mama yake ambaye anaugua saratani.

Msanii huyo wa kitambo wa ‘Monalisa’ alipatiwa mchango wa Zaidi ya shilingi milioni moja lakini sasa ameibuka akisema kuwa japo mambo yamenaza kutengemaa upande wake lakini bado ana uhitaji Zaidi wa angalau milioni moja na nusu ili kumalizana na tatizo la afya ya mama yake kabisa.

Katika mahojiano na chaneli ya Goldmine, Colonel Mustafa aliwashukuru wengi waliojitokeza kwa wingi kumpa msaada wa kifedha na kuwasihi wasichoke kuendelea kusimama naye kwa ajili ya afya ya mama yake.

“Tuko sehemu nzuri angalau lakini tuseme tukipata milioni moja au milioni moja na nusu hivi tutamalizana na tatizo la mama yangu. Mama atapata kutibiwa kabisa na sasa hapo kama ni muziki nitajisimamia na kama ni kazi mtanipatia nitajishughulikia,” alisema.

Awali katika mahojiano na kituo kimoja cha redio, Mustafa alikiri kwamba alikuwa ameacha kabisa masuala ya muziki lakini baada ya mashabiki wengi kujitokeza wakimsihi kurudi, alikubali kuwa akimalizana na afya ya mama yake atarejea kwenye muziki na angalau kufanya wimbo mmoja wa kutoa shukrani kwa Mungu na mashabiki.

Mustafa vile vile alisema kuwa hayuko katika mahusiano ya kimapenzi baada ya kuachana na Notiflow miaka kadhaa iliyopita, na kusema kuwa huenda akarudi kwenye safu hiyo baada ya kujirudi kwani kwa asa hawezi kwa sababu alipoteza ujasiri wake kama mwanamume baada ya video ile ya kufanya kazi kwenye mjengo kuibua hisia mseto mitandaoni kumhusu.