Gaucho amtambua mwanamume aliyemshambulia wakati wa maandamano mahakamani

Rais wa Bunge la Wananchi na mfuasi mkuu wa kiongozi wa Azimio Raila Odinga, Calvince Okoth, almaarufu Gaucho, amesimulia matukio ya kutisha aliyokumbana nayo mikononi mwa maafisa wa polisi waliomshikilia kwa zaidi ya siku mbili.

Gaucho, ambaye aliachiliwa Ijumaa, Julai 21, kwa dhamana ya Ksh100,000 pesa taslimu, alimweleza Hakimu Lucas Onyina kwamba alipata majeraha mwilini ambayo yaliletwa na maafisa wa polisi ambao anawafahamu.

Mwanasiasa huyo mkali alimtaja mwanamume huyo kuwa kiongozi wa kikosi kilichomzaba  makofi, mateke na vipigo akiwa chini ya ulinzi wa polisi.

"Huyu ndiye mwanamume aliyenipiga nilipokuwa seli kabla ya kuwaamuru vijana wake kunishambulia," Gaucho alidai alipokuwa akihutubia mahakama.

Gaucho, ambaye alifikishwa kortini pamoja na Mbunge wa Embakasi Mashariki Babu Owino, alimweleza Hakimu kuwa Afisa Mkuu wa Kituo cha Polisi pia aliamuru vijana wake wampige vikali.

"Kwa kufuata maagizo ya wakubwa wao, maafisa wa chini walimshambulia bila huruma huku akiomba aachiliwe. Wakili wa Gaucho, Ndegwa Njiru, alimwomba Hakimu Onyina kuamuru polisi kurekodi malalamishi hayo kwa vile wananuia kuchukua hatua za kisheria dhidi ya watekelezaji sheria hao.

Umeamuru kwamba tupeleke malalamiko mbele ya afisa wa polisi, lakini kuna uwezekano mkubwa, afisa huyo atakataa kuchukua malalamiko yetu jinsi wanavyoshutumiwa hapa.

“Tunaomba agizo zaidi kwamba malalamishi haya yaandikwe kwa Mamlaka Huru ya Kusimamia Polisi (IPOA) au tulazimishe kituo cha polisi kuchukua malalamishi yetu kwa kuwa mahakama hii ina ulinzi wa katiba,” Njiru aliomba Hakimu.

Njiru pia alikashifu unyanyasaji wa polisi katika mchakato mzima wa kuwatafuta wateja wake na kuwatetea mahakamani, akibainisha kuwa OCS huyo alikuwa na kiburi sana kwa kila mtu, wakiwemo mawakili.