Katibu mkuu wa Ugatuzi Korir afikishwa mahakamani kwa kosa la kumshambulia mwanamke
- Katibu mkuu wa Ugatuzi Korir afikishwa mahakamani kwa kosa la kumshambulia mwanamke
Katibu Mkuu wa Ugatuzi Julius Kiplagat Korir ameitwa kufika mbele ya mahakama ya Nairobi kushtakiwa kwa kumpiga mwanamke.
Hakimu Mkuu wa Milimani Susan Shitubi alimuita Naibu Waziri baada ya upande wa mashtaka kuomba aitwe kwa kesi ya shambulio.
"Tunaomba hati za wito dhidi ya mshtakiwa kupitia kwa afisa mpelelezi kufika kortini na kujibu mashtaka," mwendesha mashtaka aliambia mahakama.
Korir atafikishwa mahakamani Februari 10.
Katika shtaka lililowasilishwa kortini, Korir anashtakiwa kwa kumpiga Everlyn Koech kinyume cha sheria na kumsababishia madhara mwilini.
Anadaiwa kutenda kosa hilo mnamo Septemba 17, 2020, katika Barabara ya Ndalat Karen jijini Nairobi.
Mwaka jana, Korir alihamia Mahakama Kuu kusitisha mashtaka yake, lakini Jaji Anthony Mrima, mnamo Novemba 2021, alitupilia mbali ombi hilo kwa msingi kwamba Serikali ilikuwa na haki katika kuendeleza mashtaka dhidi yake kwa kosa la kushambulia na kumjeruhi Evelyn Koech alipokuwa mimba.
Alikuwa ametaka kumzuia Mkurugenzi wa Mashtaka (DPP) na Kurugenzi ya Upelelezi wa Makosa ya Jinai (DCI) kumkamata na kumfungulia mashtaka kuhusiana na kosa hilo, akitaja kama kinyume cha sheria, kwa nia mbaya na ukiukaji wa haki zake za kikatiba.
“Mlalamishi hajaonyesha jinsi DPP alivyokiuka Katiba kwa kuidhinisha kushitakiwa kwake. Zaidi ya hayo, ikiwa mahakama itabatilisha au kutoa amri inayotakiwa, itavuruga utawala wa sheria,” Jaji Mrima aliamua.