Ikiwa una ushahidi dhidi ya mchungaji Ezekiel ripoti kwa polisi - mawakili

Mawakili wa mwinjilisti Ezekiel Odero sasa wanataka yeyote aliye na ushahidi dhidi yake ajitokeze.

Wakizungumza siku ya Jumatatu, mawakili hao walisema yeyote aliye na ushahidi wa uhalifu anaodaiwa kutenda anapaswa kuupeleka kwa kituo chochote cha habari au kuripoti kwa kituo chochote cha polisi.

Mawakili hao (Danstan Omari na Cliff Ombeta) walisema hakuna mshtaki katika kesi hiyo na polisi wanaendelea na msako mkali.

"Ezekiel ametutuma akatuambia wewe kama mtu ambaye una ushahidi nenda kwenye chombo chochote cha habari ukatangaze," Danstan Omari alisema.

Ombeta alisema "Hakuna aliyekuja kusema Ezekiel amewaua au kuwafanyia itikadi kali. Hakuna mtu aliyekuja kusema amewatapeli pesa."

Mawakili hao wawili walisema wanaamini katika mfumo wa haki wa Kenya, na kuongeza kuwa mahakama itamtetea Mchungaji Ezekiel.

Omari alisema vyombo vya habari viache kuchafua jina la mteja wao.

Kasisi Ezekiel Odero aliachiliwa kwa dhamana ya Sh3 milioni au dhamana ya Sh1.5 milioni pesa taslimu Alhamisi.

Upande wa mashtaka ulikuwa umetuma maombi ya kumzuilia Odero kwa siku 30, akitoa hati za kiapo katika kesi iliyohusisha vifo vya watu wengi.

Hata hivyo, hakimu mkuu mwandamizi wa Shanzu Joe Omido alitupilia mbali ombi hilo.

Mhubiri wa Kanisa la New Life Church and Prayer Center tayari alikuwa amekaa kizuizini kwa siku saba.

Mwinjilisti Ezekiel Odero wa kanisa la New Life Prayer Center amedai amepata hasara ya Sh20 milioni tangu alipokamatwa Aprili 27, 2023.

Katika barua ya wakili wake Danstan Omari kwa Inspekta Jenerali wa Polisi Japheth Koome, Mchungaji Ezekiel- kama anavyojulikana kawaida- alisema hasara hiyo ni pamoja na gharama za malazi zinazotarajiwa na kanisa (Sh2 milioni) na kupoteza chakula (Sh500,000).

Ezekiel alisema hasara ya sadaka na zaka pamoja na uharibifu wa taswira yake na sifa ya kanisa ni Sh17 milioni.

Omari alisema ana maagizo ya kumfungulia mashtaka Koome kwa kuendelea kukiuka haki za binadamu na uhuru wa kimsingi wa mteja wake.

Alibainisha kuwa suala hilo alilizungumzia kwa Mamlaka Huru ya Kipolisi na Kusimamia ili mwenendo wa Koome uchunguzwe.

Omari alisikitika kwamba mnamo Mei 7, 2023, maafisa wa polisi waliingia kwa nguvu katika kanisa la mteja wake huku wengine wakizuia lango la kuelekea mahali pa ibada, hivyo kuwafanya waumini wasiweze kukusanyika kwa ajili ya ibada yao ya Jumapili.

"Cha kusikitisha ni kwamba mnaendelea kutenda kinyume na haki ya mteja wetu ya kuabudu, kuongoza wengine katika ibada, uhuru wake wa kujumuika na wengine na kujieleza," aliongeza.