Aliyekuwa Waziri wa Ulinzi Eugene Wamalwa ameikosoa Kurugenzi ya Upelelezi wa Jinai kwa jinsi walivyoshughulikia aliyekuwa kiongozi wa Mungiki Maina Njenga.
Akizungumza Alhamisi nje ya makao makuu ya Kurugenzi ya Upelelezi wa Jinai, Wamalwa alisema Njenga ni Mkenya na anastahili kutendewa haki.
Wamalwa alisema DCI alipendelea mashtaka mapya dhidi ya Njenga.
"Tuliambiwa alikuwa akipelekwa katika mahakama ya Nakuru na pia tumeambiwa wanaelekea katika mahakama ya Kiambu kwa njia ya siri sana. Tumefedheheka sana kwamba DCI wetu anaweza kujiendesha kwa njia isiyo ya kitaalamu."
Waziri huyo wa zamani alisema Njenga alichukuliwa kutoka kwa wakili wake na kupelekwa kortini.
Wamalwa aliongeza kuwa Njenga huenda aliitwa kiongozi wa Mungiki hapo awali lakini sasa ni kiongozi aliyefanyiwa mageuzi.
Hii ni baada ya Njenga Alhamisi asubuhi kujiwasilisha katika makao makuu ya DCI kuhojiwa.
Njenga alikuwa amejipeleka mwenyewe katika afisi za Kurugenzi ya Upelelezi wa Jinai Kaunti ya Nakuru ili kurekodi taarifa.
Ni pale ambapo aliambiwa ajiwasilishe kwa makao makuu ya DCI jijini Nairobi.
Viongozi wa Azimio na wafuasi wake walikusanyika nje ya afisi za DCI kuonyesha mshikamano naye.
Walisikika wakiimba 'Mwenyekiti' walipokuwa wakisubiri kumuona kiongozi wao aliyekuwa ndani ya afisi za DCI.
"Tunataka Mwenyekiti akuje," umati ulipiga kelele.
Polisi walikabiliana na wafuasi wa Njenga na kuwatawanya vitoa machozi.