Walimuua kaka yangu - Naibu Rias Gachagua afichua

Naibu Rais, Rigathi Gachagua anaamini kwamba kakake marehemu na Gavana wa Nyeri wakati huo Nderitu Gachagua alilishwa sumu na watu aliowataja kama wauzaji katika sekta ya kahawa.

Kulingana na Gachagua, kakake alikuwa mzima hadi alipohisi kuumwa ghafla na kufariki Februari 24, 2017.

Nderitu aliaga dunia katika Hospitali ya Royal Marsden huko London ambako alikuwa akipatiwa matibabu ya saratani ya kongosho.

"Familia yetu inaamini na tunajua marehemu Nderitu Gachagua alilishwa sumu na watu hao," alisema Gachagua wakati wa mahojiano na runinga ya Inooro.

"Tangu wakati huo, kakangu  mwenye afya njema alianza kuwa mgonjwa na tunaamini kuwa watu hawa walimdhuru".

Naibu Rais, ambaye amepewa jukumu la kuongoza mageuzi ya sekta ya kahawa aliongoza mkutano  wa kitaifa wa kahawa wa siku mbili, ameapa kukandamiza mashirika ambayo alisema yamejipenyeza katika sekta hiyo na kuendelea kuvuna faida zilizokusudiwa kwa wakulima.

Wakati wa mkutano uliofanyika Meru ambao uliwaleta pamoja viongozi na washikadau wengine kutoka kote nchini, ilikubaliwa kwamba Bodi ya Kahawa ya Kenya kama ilivyopendekezwa katika Mswada wa Kahawa wa 2023 iundwe upya.

Ujenzi wa vituo vya kujumlishia kahawa ili kuboresha ubora wa kahawa na kuiwezesha Bodi ya kudhibiti wadudu kupambana na wadudu na magonjwa ya kahawa pia ni sehemu ya mapendekezo ambayo yanatakiwa kutekelezwa na timu teule kabla ya kutekelezwa siku 90 zijazo.

Akiangazia jinsi mashirika hayo yalivyo hatari, Naibu Rais alisema kuwa magavana waliwekwa kando kimakusudi na badala yake, mawaziri watatu wa baraza la mawaziri-Mithika Linturi (Kilimo), Moses Kuria (Biashara) na Simon Chelugui (Vyama vya Ushirika) walichaguliwa kuongoza mchakato huo.

“Vita hivi haviwezi kushindwa na magavana, hii inaweza tu kushindwa na naibu rais na rais, watu hawa; ni hatari na wanaweza hata kukuua,” alisisitiza.

"Rais alinipa jukumu la kuwaongoza watu hawa kwa sababu nina rasilimali nyingi zaidi ikiwa ni pamoja na usalama kwani hawa si watu wazuri".