Wetang'ula apokea ombi la kutaka kupigwa marufuku kwa Tik Tok nchini Kenya

Mkenya mmoja amewasilisha ombi mbele ya Bunge la Kitaifa la kupiga marufuku mtandao wa kijamii wa TikTok nchini Kenya.

Spika wa Bunge la Kitaifa Moses Wetangula alitangaza Jumanne kwamba Mkurugenzi Mkuu Mtendaji wa Bridget Connect Consultancy Bob Ndolo amewasilisha ombi hilo kutokana na maudhui kwenye jukwaa.

Kulingana na mwombaji, mtandao wa kijamii unakuza vurugu, maudhui ya ngono ya wazi, matamshi ya chuki, lugha chafu na tabia za kuudhi miongoni mwa vijana.

Amezidi kulalamika kuwa Mamlaka ya Mawasiliano (CA) haijasimamia jukwaa na mambo yanazidi kwenda kombo.

Ndolo anaendelea kusema kuwa kutokana na ukosefu wa udhibiti na tabia ya uraibu ya programu, huenda nchi ikashuhudia kushuka kwa ufaulu wa masomo na kuongezeka kwa masuala ya afya ya akili miongoni mwa vijana.

Mwombaji alidai kuwa TikTok hukusanya kiasi kikubwa cha data kwa watumiaji wake ikiwa ni pamoja na maelezo kuhusu kifaa chao, eneo na historia ya kuvinjari, na kuishiriki na makampuni mengine bila idhini ya watumiaji.

Pia alirejelea visa vya zamani wakati jukwaa limehusika katika mabishano kote ulimwenguni kwa kukusanya data kutoka kwa watumiaji kinyume cha sheria.

"TikTok imehusishwa na kashfa kadhaa za faragha katika miaka iliyopita. Kwa mfano, mwaka wa 2019, programu ilitozwa faini ya dola milioni 5.7 na Tume ya Shirikisho la Biashara la Marekani kwa kukusanya taarifa za kibinafsi kutoka kwa watoto walio na umri wa chini ya miaka 13 kinyume cha sheria kwa kukusanya data kama vile majina. , anwani za barua pepe na maeneo kutoka kwa watumiaji wachanga bila idhini ya wazazi wao na hivyo kukiuka Sheria ya Kulinda Faragha ya Watoto Mtandaoni," ilisoma sehemu ya ombi hilo.

Wetangula ameiagiza Kamati ya Malalamiko ya Umma kuzingatia ombi hilo na kuwasilisha ripoti ya matokeo hayo Bungeni.