Chama cha ODM kitaishi hata baada yangu - Raila Odinga

Kiongozi wa chama cha Orange Democratic Movement (ODM) Raila Odinga amesema kuwa chama hicho kitaishi zaidi ya kuwepo kwake.

Akiongea Jumamosi, Raila alisema chama hicho kimejenga viongozi dhabiti ndani ya miundo yake, walio na nguvu na wanaweza kufika mbali zaidi ya ilivyo sasa.

Alisema Naibu viongozi wa chama Hassan Joho na Wycliffe Oparanya, ni miongoni mwa viongozi hao.

Raila, hata hivyo, aliwakumbusha wanachama wa chama hicho kwamba chama cha Orange kinaweza tu kuwa na nguvu kama umoja wa uongozi wake.

"Chama cha ODM kimejenga watu madhubuti, Hassan Joho ana nguvu, Wyclife Oparanya ana nguvu na Gavana Simba Arati pia ana nguvu. ODM yenye nguvu itakuja tu kupitia umoja wa uongozi wa ODM na lazima tusaidie walio chini hapa.

"ODM lazima isimame kupita muda wa majaribio, ODM itaishi zaidi ya Baba. Hata kama Baba hayupo ODM inapaswa kuwepo na kusalia kuwa chama chenye nguvu cha kisiasa. Na hii itafanyika tu ikiwa mtashirikiana," Raila alisema.

Alizungumza huko Suna Mashariki ambapo alihudhuria kutawazwa kwa Fredrick Owili kama Ogayi wa Seme. Raila pia alikuwa mgeni mkuu katika hafla hiyo.

Kiongozi huyo wa Upinzani aliendelea kuwataka viongozi ndani ya ODM ambao wamekuwa wakichochea vita kuhusu urithi wake kukoma.

"Usijaribu kuleta mapigano kati ya watu hawa Ukiona Joho, Oparanya au Simba, basi unamuona Baba."

Raila alitoa wito kwa viongozi wote waliochaguliwa katika ngazi zote kuheshimiana, hata wanapotekeleza majukumu yao.

Aliwataka kuzingatia kuwafanyia kazi wananchi waliowachagua, akisisitiza kuwa, ndivyo watu watakavyojua ODM ni chama cha kazi na maana yake ni biashara.

Tangu Raila aeleze nia yake ya kuwa mwenyekiti ajaye wa Tume ya Umoja wa Afrika, kumeibuka vita vya urithi kutoka ndani ya chama chake.

Makundi kadhaa yameibuka yote yakisisitiza kuwa wako tayari kupeleka chama mbele.