Uhuru ndiye alinipigia simu na kuniomba niongee na rais Ruto kwa ajili ya Kenya - Raila

Kiongozi wa Azimio Raila Odinga sasa amefichua jinsi mazungumzo yake na rais William Ruto yalivyotokea.

Akizungumza katika kaunti ya Elgeyo Marakwet katika mazishi ya babake aliyekuwa kamishna wa tume ya uchaguzi na mipaka IEBC Irene Masit, Odinga alifichua kwamba rais mstaafu Uhuru Kenyatta ndiye alimshawishi kufanya hivyo.

Kwa mujibu wa kinara huyo wa ODM, Uhuru Kenyatta alimpigia simu na kumtaka kufanya mazungumzo na rais William Ruto kwa ajili ya kuinusuru Kenya kutokana na machafuko yaliyozuka kufuatia msururu wa maandamano ya Gen Z.

“Nchi ilipokuwa na msukosuko, aliyekuwa Rais Kenyatta alinipigia simu na kuniomba niwasiliane na Rais Ruto ili kutafuta suluhu ya matatizo ya Jenerali Z. Tulijadili hali hiyo, na nikashiriki mawazo yangu kuhusu jinsi ya kuishughulikia,” alisema.

Odinga alikanusha madai kwamba alikuwa amewaacha wenzake wa Azimio na kujiunga na serikali pana.

Alifafanua kuwa kuhusika kwake ni kumsaidia Ruto pekee katika kuwatambua wanaofaa kutoka upande wake wa utawala.

“Mimi si sehemu ya serikali. Hatukukubaliana kuhusu serikali ya mseto. Ruto aliniomba nisaidie kutambua watu kutoka upande wangu kuhudumu katika utawala wake, jambo ambalo nilifanya. Nina imani kuwa tutasonga mbele kama taifa,” aliongeza.

Maoni ya Odinga yanakuja huku kukiwa na uvumi kuhusu jukumu lake katika utawala wa Rais Ruto.

Mnamo Julai 19, Rais Ruto alitangaza orodha mpya ya wateule wa baraza la mawaziri, iliyoapishwa mnamo Agosti 8, ambayo ilijumuisha wanachama wanne wakuu wa chama cha ODM: John Mbadi (Hazina ya Kitaifa), Opiyo Wandayi (Nishati na Petroli), Hassan Joho (Madini, Uchumi wa Bluu, na Masuala ya Bahari), na Wycliffe Oparanya (Ushirika na Maendeleo ya Biashara Ndogo, Ndogo na za Kati).

 Uteuzi huu umezua hali ya kutoridhika ndani ya upinzani.