Mahaba bungeni!Mbunge wa Mathira Eric wa Mumbi kumuoa mwakilishi kike wa Murang'a Betty Maina

Mbunge wa Mathira Eric Wa Mumbi na Mwakilishi wa Kike katika kaunti ya Murang'a Betty Maina wanatarajiwa kufanya harusi ya kipekee itakayohudhuriwa na Naibu Rais Rigathi Gachagua.

Gachagua ndiye atawaongoza wajumbe wa Mathira katika hafla ya kujadili mahari huku upande wa Maina ukiongozwa na Mbunge wa Kiharu Ndindi Nyoro.

Wawili hao kwa sasa wanaishi pamoja, huku wakiadhimisha miaka 2 ya kuwa pamoja.

Siku ya hafla hiyo muhimu kwa wawili hao haijatajwa.

Habari hizi njema zilithibitishwa na Eric Wa Mumbi wakati wa mahojiano na Inooro TV siku ya Jumatatu, Aprili 18. 

"Sasa tumeamua kuishi pamoja kama mume na mke na Bw Gachagua atakuwa kiongozi wa ujumbe wangu wa posa wakati ambapo Mathira itakutana na Murang'a kuchukua binti wao," alithibitisha Mumbi.

Mumbi alifichua kwamba alikutana na Betty mwaka wa 2021, na kugundua kuwa alikuwa kila kitu alichokihitaji katika mke.

Kulingana na mbunge huyo, walianza kuchumbiana wakati wa kampeni za Uchaguzi Mkuu wa 2022, na walikubaliana kuanza kuishi pamoja.