Seneta wa Migori Eddy Oketch asimulia chimbuko la jina lake la kati "Gicheru"

Seneta wa Migori Eddy Oketch ameeleza chimbuko la jina lake la pili, 'Gicheru'.

Akiwa seneta wa Kaunti ya Migori inayokaliwa zaidi na jamii za Waluo na Wakuria, jina hilo lake lenye asili ya Mlima Kenya limekuwa likiibua utata mwingi miongoni mwa watu.

Wakati wa mahojiano na Spice FM, Oketch alifichua kuwa alizaliwa na kukulia Uriri, kijiji cha Migori, hadi 2003 mamake alipoaga dunia.

"Nilipofiwa na mama yangu, maisha yalikuwa magumu kidogo kijijini. Kisha tulikuwa wakulima wa tumbaku," alisema.

Oketch alisema hawakuwa wakulima wa tumbaku waliobobea kama familia nyingine katika eneo hilo na mama yake alipofariki, hali ilikuwa ngumu zaidi.

"Kwa sababu hiyo, niliacha shule kidogo. Kisha nikapata njia ya kuingia katika mji wa Migori," alisema.

Katika mji wa Migori, aliishia kuishi na familia kadhaa jambo ambalo lilimpa fursa.

Kutokana na nafasi alizoweza kupata, Oketch alijipata katika mitaa ya nyuma ya Nairobi.

Akiwa anaishi katika mitaa ya Nairobi akijaribu kufahamu ulimwengu, Seneta huyo alisema aliishia kuishi na familia saba.

"Familia hizi za kambo ziliniunga mkono kwenda shule na ninawathamini sana," alisema.

"Mmoja ni wakili katika jiji la Nairobi ambaye alinilipia karo huku mwingine akiwa mwalimu huko Migori ambaye alikaa nami kwa muda."

Oketch alisema familia moja iliyomtoa mtaani na kumpa nafasi ya kuwa jinsi alivyo leo ni familia ya Gicheru.

"Nilihisi kwamba kwa sababu familia ya Gicheru ilinirudisha shuleni, ingekuwa muhimu kwamba wawe sehemu ya maisha yangu, ya mimi nilivyo. Hivyo jina la kati Gicheru," alisema.