Mwanafunzi wa Grade 3 aokolewa baada ya kutekwa nyara na mwalimu wake wa darasa

Mwanafunzi wa miaka 9 wa darasa la tatu kutoka Donholm, Kaunti ya Nairobi aliokolewa baada ya kutekwa nyara na mwalimu wake.

Kulingana na DCI, babake mwanafunzi huyo alikuwa ameenda kumchukua mwanawe shuleni alipompata hayupo.

Aliarifiwa mwanawe ameondoka pamoja na mwalimu wake wa Darasa Erick Mosoti.

Baadaye baba huyo alipokea ombi la fidia ya Sh milioni 10 na kumfanya baba huyo kuripoti katika kituo cha polisi cha Buruburu.

Juhudi za kumtafuta mwalimu huyo hazikufua dafu.

Timu ya wapelelezi kutoka kwa Kamandi ya Mkoa wa Nairobi kwa ushirikiano na wafanyakazi wenza kutoka DCI Buruburu walianzisha operesheni ya kina katika eneo la Kayole Sabasaba.

Operesheni hiyo ilipelekea kuokolewa kwa mtoto huyo ambaye alikuwa amefungiwa katika chumba kinachoaminika kukodiwa na mwalimu mwingine ambaye ni George Odhiambo, anayefanya kazi katika shule moja na mshukiwa mkuu.

Mtoto huyo aliokolewa mara moja na kupelekwa hospitali kuchunguzwa afya yake huku msako ukiendelea.

 

Saa kadhaa baadaye mshukiwa aliyeitwa Fredrick Odhiambo, alipatikana akitoa madai ya fidia badala ya uhuru wa mtoto huyo.

Pikipiki, simu ya mkononi, na vitu vingine vinavyosadikiwa kutumika katika kitendo hicho cha kinyama vilipatikana na kuwekwa kwenye vielelezo huku operesheni ikiendelea kuwaleta washukiwa wengine.