Jamaa aishataki hospitali kwa kumruhusu kushuhudia mkewe akizaa kwa upasuaji
Mwanamume huyo anataka hospitali kumlipa pesa za Kenya shilingi bilioni 147 kwa kile anadai baada ya kuona viungo vya ndani vya mkewe pamoja na damu, alipata tatizo la kisaikolojia na hajawahi kuwa na hisia na mkewe tangu kuona tukio hilo.
• Hospitali hiyo ilisema kuwa haikuwa imekiuka "wajibu wa huduma", na Bw Koppula hakupata jeraha lolote kwa sababu ya upasuaji aliouona.
Mwanamume mwenye asili ya India nchini Australia ameishtaki hospitali moja na kutaka hospitali hiyo imlipe fidia ya dola bilioni moja [shilingi bilioni 147 za Kenya] kwa madai kwamba alipata "ugonjwa wa akili" kutokana na kutazama mke wake akijifungua kwa njia ya C-section, au kwa upasuaji.
Kulingana na gazeti la The Independent, mwanamume huyo aliyetambulika kwa jina la Anil Koppula, alifungua kesi dhidi ya Hospitali ya Royal Women's Hospital, ambapo mkewe alijifungua Januari 2018.
Katika kesi yake, alidai kuwa "alitiwa moyo" au "kuruhusiwa" na hospitali hiyo kuwepo katika chumba ambacho mkewe alikuwa anafanyiwa upasuaji wa kujifungua, na kwamba, kuona viungo vya ndani vya mke wake na damu vilisababisha mwanzo wa "ugonjwa wa kisaikolojia".
“Bw Koppula anadai kuwa alihimizwa au kuruhusiwa kuona wakati wa kujifungua, kwamba katika kufanya hivyo, aliona viungo vya ndani vya mkewe na damu...Anasema kuwa Hospitali ilikiuka wajibu wa kumtunza na hivyo itawajibika kumlipa fidia," waraka huo ulisomeka, kulingana na jarida hilo.
Kesi ya Bw Koppula inataka fidia kutoka kwa Hospitali ya Royal Women ya kiasi cha dola bilioni 1 za Australia.
Wakati wa kesi mahakamani, alisema kuwa pamoja na kusababisha "ugonjwa wa akili", kutazama mchakato wa upasuaji wa kujifungua kumesababisha "kuvunjika kwa ndoa yake".
Hasa, Bw Koppula alikuwa ameshuhudia kuzaliwa kwa mtoto wake kupitia C-Section mnamo Januari 2018. Upasuaji hufanywa katika hali fulani wakati wahudumu wa afya wanaamini kuwa ni salama zaidi kwa mama na/au mtoto. Ni kujifungua kwa upasuaji kwa mtoto kupitia chale iliyochongwa kwenye fumbatio na uterasi ya mama.
Kulingana na gazeti la New York Post, siku ya Jumatatu, Mahakama ya Juu ya Victoria ilitupilia mbali madai ya Bw Koppula, na kuyataja kuwa "matumizi mabaya ya utaratibu".
Hospitali hiyo ilisema kuwa haikuwa imekiuka "wajibu wa huduma", na Bw Koppula hakupata jeraha lolote kwa sababu ya upasuaji aliouona.
Jaji wa Australia aliripotiwa kuamua kwamba Bw Koppula hana deni la fidia yoyote kwa sababu hakupata hasara yoyote ya kiuchumi na madai ya ugonjwa wake haufikii kizingiti kwa kile kinachochukuliwa kuwa "jeraha kubwa".