Raila akosa pa kuficha uso MCA wa kike wa Turkana akimkabili kwa maswali magumu hadharani
Baada ya mwanamke huyo kumzomea na kumuuliza maswali makali Raila Odinga, kiongozi huyo wa upinzani alilazimika kuondoka bila kutoa hotuba na baadae kulaumu vurugu hizo kwa rais Ruto.
• Kuya alidai upendo wa eneo hilo kwa mwanasiasa huyo mkongwe unalinganishwa tu na ule wa Yesu wa kibiblia, akidai kuwa Raila amewalipa tu kwa dharau.
Ijumaa wakati wa hafla ya kusherehekea utamaduni na utalii wa kaunti ya Turkana unaojumuisha jamii kutoka mataifa matatu ambao wanazungumza lugha moja, mwakilishi wa wadi ya Lodwar Township Ruth Kuya alimkabili kiongozi wa upinzani Raila Odinga na maswali magumu.
Odinga alikuwa mmoja wa viongozi wakuu waliohudhuria hafla hiyo ya kitamaduni na kwa ishara zote hakuwa amejipanga kukabiliwa na maswali ya kijasiri kutoka kwa mwanasiasa huyo mchanga wa kike.
Kuya, kwa ujasiri alimzomea Odinga hadharani huku akimuuliza maswali magumu kwa kile alidai kwamba kiongozi huyo wa ODM amekuwa akitenga jamii za kutoka eneo hilo licha ya kuwa wengi wao wamekuwa wakimuunga mkono katika chaguzi za awali.
Kuya alidai upendo wa eneo hilo kwa mwanasiasa huyo mkongwe unalinganishwa tu na ule wa Yesu wa kibiblia, akidai kuwa Raila amewalipa tu kwa dharau.
"Siogopi kuongea. Gavana na wageni waheshimiwa. Ninachotaka kusema ni kwamba Raila anastahili kukaribishwa kama babu eneo hili; ni utamaduni wa watu wa Turkana. Raila, unaheshimiwa. Sisi Waturkana watu wanakupenda kama Yesu, na ulionekana kutuchukia kama shetani. Badala ya kutupatia uteuzi, unampa binti yako. Vijana wako taabani, na wanahitaji kazi," Kuya alimzomea.
Alihoji ni kwa nini Raila bado hajaajiri kijana yeyote kutoka eneo hilo kufanya kazi katika afisi yake licha ya kuwa mwaminifu kwake.
"Umetuma wangapi ofisini kwako babu yetu tunakupenda, hatukuchukii bali tunalia kama watoto wako. Naomba kuuliza ofisi yako kwanini usituajiri? Turkana tumewahi kupokea uteuzi?" aliuliza.