Wafanyikazi wa Chuo Kikuu cha Moi watishia kususia kazi kwa kucheleweshwa kwa mishahara

Zaidi ya wafanyikazi 3,500 wa Chuo Kikuu cha Moi wametishia kususia kazi kutokana na kutolipwa mishahara.

Maafisa kutoka miungano inayowakilisha wafanyikazi hao walikutana mjini Eldoret na kusema kuwa watasusia kazi kuanzia tarehe 3 mwezi ujao ikiwa usimamizi wa chuo kikuu hautawalipa.

Waliongozwa na katibu wa tawi la UASU Dkt Busolo Wegesa, Mary Chepkwemoi kutoka KUSU na Benson Magasi kutoka KUDHEIHA.

Wanadai mishahara ya Februari na Machi mbali na marupurupu mengine.

Dk Wegesa alisema wengi wa watumishi hao walishindwa kuripoti kazini kwa sababu hawana fedha za kutumia nauli au mahitaji mengine muhimu ikiwemo chakula.

Chuo kikuu kimekuwa kikikabiliwa na changamoto kubwa za kifedha huku madeni yakifikia zaidi ya sh Bilioni 6.

Madeni hayo ni pamoja na makato ya kisheria yasiyolipwa kwa wafanyakazi.

Chepkwemoi alisema wafanyikazi hao pia wanahusika na makato ya mishahara yao kinyume cha utaratibu.

"Chuo kikuu kimepuuza mkataba wetu wa CBA uliotiwa saini na kinaendelea kukata makato kinyume cha sheria kutoka kwa mishahara yetu bila kushauriana na mtu yeyote", alisema Chepkwemoi.

Naibu Chansela wa Chuo hicho Profesa Isaac Kosgey alifungiwa katika mkutano katika Chuo Kikuu na hakuweza kupatikana kwa maoni yake.

Maafisa wengine walisema mkutano huo wa mgogoro ulikuwa wa kujadili mgogoro wa mishahara miongoni mwa mambo mengine.