Bei ya unga, sukari yasalia juu huku Wakenya wakikabiliana na gharama ya juu ya maisha

Wakenya wataendelea kuingiza zaidi mifukoni mwao huku bei ya vyakula ikiendelea kupanda.

Haya ni hata baada ya Rais William Ruto kutoa hakikisho kuwa serikali yake inajitahidi kupunguza gharama ya maisha.

Wakati wa mahojiano yake ya Jumapili kwenye televisheni, Rais alisema serikali inachukua hatua mbalimbali ili kuhakikisha kuna ongezeko la usambazaji wa chakula.

“Ili kutatua suala la gharama kubwa ya maisha, serikali inaongeza uzalishaji kwa kushirikiana na wakulima kufanikisha hili. Tunasaidia wakulima kwa mbolea na mbegu na ekari zaidi ya 200,000 za ardhi zimewekwa katika uzalishaji,” alisema.

Kuhusu uagizaji wa mahindi, Ruto alisema hadi sasa nchi imeagiza tani 250,000 za mahindi.

“Pia tumeongeza usambazaji. Tumeagiza nje takriban tani 250,000 za mahindi, tani 75,000 za mchele, tani 30,000-40,000 za maharage na takriban tani 100,000 za mafuta ya kupikia. Kwa muda mfupi, tutalazimika kuongeza usambazaji kupitia uagizaji na kwa muda mrefu, tutaongeza usambazaji kupitia uzalishaji,” Ruto alisema.

Rais aliambia Wakenya kwamba njia pekee ya uhakika ya kupunguza gharama ya maisha na chakula ni kupitia uzalishaji.

Ukaguzi wetu ulionyesha kuwa bei ya unga wa mahindi imesalia katika kiwango cha juu cha Sh190-Sh230 kwa pakiti ya kilo 2.

Unga wa bei nafuu zaidi katika maduka makubwa ya humu nchini ni chapa ya unga wa mahindi ya Ajab ambayo inauzwa kwa Sh194 lakini rafu za chapa hiyo zilikuwa tupu wakati tulipozuru.

Chapa nyingine za unga wa mahindi zinauzwa kwa Sh204 hadi Sh262 kwa baadhi ya chapa zinazotambulika.

Katika duka kuu la Quickmart, unga ulikuwa ukiuzwa kati ya 198 kwa chapa ya Mama, Joggo kwa Sh205, Ndovu kwa Sh210, chapa ya Papo Halo Sh215 huku chapa za Raha, Amaize na Hostess zikiuzwa kwa Sh256, SH250 na Sh245 mtawalia.

Kwa upande mwingine, bei ya sukari imepanda maradufu tangu mwanzo wa mwezi.

Pakiti ya kilo mbili ya sukari iliyokuwa katika wiki ya kwanza ikiuzwa kwa wastani wa Sh200 sasa inauzwa Sh420 kwa pakiti ya 2kg.

Wateja wengi sasa wanapendelea kununua kilo moja ya sukari badala ya pakiti ya kawaida ya kilo 2 kutokana na gharama kubwa.

Ukaguzi uliofanywa na Star mnamo Mei 16, ulionyesha kuwa chapa ya bei nafuu zaidi ya sukari katika soko kuu inauzwa kwa Sh189 kwa pakiti ya kilo moja.

Katika duka kuu la Naivas, kilo moja ya sukari nyeupe ya chapa ya Mara inauzwa kwa Sh189, sukari nyeupe ya Naivas inauzwa kwa Sh350 kwa pakiti ya kilo 2 lakini mteja anazuiliwa kununua pakiti zisizozidi mbili.

Katika duka kuu la Quickmart, sukari ya kahawia ya Quickmart inauzwa kwa Sh365 kwa kilo mbili, Kabras inauzwa kwa Sh420 kwa pakiti ya kilo mbili huku pakiti ya kilo moja ya sukari ya Mumias ikiuzwa kwa Sh185.