Mungu ana njia ya kuwaadhibu watu- DP awaonya askari wanaolinda walanguzi wa dawa za kulevya

Naibu Rais Rigathi Gachagua amewasuta polisi wanaopokea hongo ili kuwalinda walanguzi wa dawa za kulevya na pombe haramu.

Akizungumza mjini Chuka siku ya Jumatatu wakati wa kongamano la wadau kujadili kukomesha unywaji pombe haramu na dawa za kulevya katika Kanda ya Mashariki, Naibu Rais aliwataka maafisa hao kuwa wazazi na kulinda maslahi ya watoto nchini.

Pia alisema kwamba wanapaswa kuwatendea watoto wa watu wengine kwa njia ileile ambayo wangependa watoto wao watendewe kama vile Mungu mbinguni alivyokuwa akitazama.

“Mungu ana njia ya kuwaadhibu watu. Ukipokea rushwa kwa madawa ya kulevya ili kuharibu watoto wa watu wengine, kuna Mungu mbinguni. Wewe pia una watoto na una jamaa,” alisema.

Alisema fedha zinazopatikana kutokana na rushwa ya dawa za kulevya na pombe haramu haziwezi kuzipeleka popote kwani fedha zinazopatikana kirahisi pia hupotea kirahisi.

"Ndio maana polisi wa trafiki wanapopata ishara ya kurudi nyumbani, wengi wao huanguka kwa sababu wamezoea kupata pesa kutoka barabarani kila siku," alisema.

"Pesa unazopata kwa bei nafuu na ambazo husababisha maumivu kwa watu wengine huenda kirahisi hivyo unakuta maafisa hawa hawajaokoa chochote."

Aidha alilaumu tishio la utumizi wa dawa za kulevya na vileo nchini kwa utawala wa awali, akibainisha kuwa serikali ya zamani ililifumbia macho suala hilo na badala yake kupeleka maafisa wa utawala wa serikali ya kitaifa ‘kuuza BBI na kuuza mradi azimio.’

Naibu Rais Rigathi Gachagua katika eneo la Menengai Kaunti ya Nakuru wiki jana alilalamika kuwa wanawake wanateseka katika eneo la Mlima Kenya kwa sababu wanaume hawatimizi haki zao za kitanda.

Alisema vijana wa kiume wanatumbukizwa katika pombe haramu wakilala kwenye mitaro na chini ya kitanda badala ya kulala kitandani na wake zao.

Naibu Rais alisisitiza kuwa wanawake wanalalamika na akaagiza polisi kuwasaidia wanawake hao kwa kutokomeza pombe na bangi na kuwarudisha vijana hao majumbani mwao.