Msiba huku wanafunzi 5 na dereva wakifariki katika ajali ya Kaburengu, Busia

Wanafunzi watano kutoka shule ya Ebenezer Academy katika Kaunti ya Busia walifariki Jumamosi jioni baada ya basi la shule walimokuwa wakisafiria kuhusika katika ajali.

Ajali hiyo ya saa moja unusu jioni ilitokea Kaburengu, karibu na mji wa Webuye, ripoti ya polisi iliyowasilishwa katika kituo cha polisi cha Matete kaunti ya Kakamega ilisema.

Basi hilo la shule linasemekana kugongwa na Mercedes Benz iliyokuwa ikisafiri kutoka Eldoret kuelekea mji wa Webuye.

Dereva wa Mercedes Benz alitoroka kutoka eneo la tukio na polisi wameanzisha msako.

Watano hao - wasichana wanne na mvulana mmoja - walikufa papo hapo.

Miili yao ilipelekwa katika hifadhi ya maiti ya Hospitali ya Kaunti ya Webuye.

"Ilitokea kwamba dereva asiyejulikana ambaye alitoroka kutoka eneo la tukio alikuwa akiendesha Mercedes Benz kutoka mwelekeo wa Eldoret kuelekea Webuye na akiwa Chimoi, alipoteza udhibiti wa gari lililotajwa kugonga basi," polisi walisema.

"Kutokana na athari, wasichana wanne na mvulana walijeruhiwa vibaya na kuaga. Dereva wa basi la shule mwenye umri wa miaka 48 pia alikufa papo hapo.

Wanafunzi wengine sita walipata majeraha na wanapokea matibabu katika hospitali ya kaunti ya Webuye.

Walimu wawili pia walijeruhiwa na wako hospitalini wakipokea matibabu.

“Miili ya wanafunzi walioaga imetolewa hadi katika chumba cha kuhifadhi maiti cha Hospitali ya Webuye ikisubiri kutambuliwa na kufanyiwa uchunguzi. Juhudi zinaendelea kumkamata dereva aliyekimbia,” polisi walisema.