Raila azuiliwa kuingia eneo la ubomoaji ya Portland Cement

Viongozi wa muungano wa Azimio wamenyimwa fursa ya kuingia eneo ambalo serikali inaendelea na shughuli za ubomozi na kuwafurusha wenyeji katika ardhi ya Mavoko Portland.

Kiongozi wa Azimio Raila Odinga alitarajiwa kuzuru eneo hilo ambapo mamia ya wakaazi wamefurushwa na kubomolewa mali yao.

Baada ya kuwasili, maafisa wa Polisi waliwaambia viongozi wa Azimio kwamba hawawezi kuruhusiwa  kuingia eneo hilo.

Viongozi wa Azimio waliambiwa wasubiri hadi wiki ijayo, Raila, aliwaambia maafisa hao hawakuwa wakileta madhara yoyote katika eneo hilo.

"Tuko hapa kuona raia ambao wameathirika,Hatuko hapa kuingilia zoezi hilo," Raila alisema.

Hata hivyo, polisi  ambaye jina lake ni Joseph, alisema kuwa wamepokea amri kutoka kwa wakubwa wao  kwamba hawafai kuruhusu mtu yeyote  kufika eneo hilo.

Kiongozi wa chama cha Wiper Kalonzo Musyoka ambaye alionekana kutoridhika aliwaambia maafisa hao kuwa walikuwa wakifuata maagizo yasiyofaa. "Unafuata ulichoambiwa,Hali hii inaweza kuamua mustakabali wako," alisema.

Katibu Mkuu wa ODM Edwin  Sifuna hata hivyo alisema kuwa Azimio itaheshimu maagizo ya polisi na hakuna haja ya makabiliano yasiyo ya lazima,"Tutakubali maagizo yoyote ambayo wametoa,Lakini tunahitaji kushughulikia jambo hilo kwa kina," alisema.

Raila aliandamana na Kalonzo, Gavana wa Machakos Wavinya Ndeti, Fernandes Barasa (Kakamega), Kiongozi wa Wachache katika Seneti Steward Madzayo, Mbunge wa Mavoko Patrick Makau miongoni mwa viongozi wengine.

Ubomoaji unaoendelea kwenye ardhi ya East African Portland Cement PLC umeingia siku ya tano, Ubomoaji huo ulioanza Ijumaa iliyopita, umeshuhudia mamia ya wakazi wa kijiji  cha kaunti ya Athi River, Machakos, wakikosa makao huku shule kadhaa na makanisa zikibomolewa.

Ubomoaji huo unatekelezwa baada ya mvurutano  wa miaka kumi kati ya kampuni ya kusagia saruji, East African Portland Cement PLC na Aimi Ma Lukenya kukamilika katika Mahakama ya Machakos ELC mnamo Oktoba 9, 2023.

Mahakama kuu ya Machakos mnamo Oktoba 9 ilitangaza East African Portland Cement PLC kuwa mmiliki halali wa ardhi LR NO. 10424 iliyoko ndani ya Athi River huko Mavoko, kaunti ya Machakos.

Hii inafuatia kesi ya kisheria nambari 74 ya 2014 iliyowasilishwa katika Mahakama ya ELC ya Machakos na baadhi ya watu binafsi, na maafisa wa kundi linalochulikana kama Aimi Ma Lukenya Society dhidi ya mashine ya kusaga saruji kuhusu mzozo wa umiliki wa ardhi mwaka wa 2014.

Kesi hiyo ilikuwa imeunganishwa na ombi nambari 10 la 2018 huku Julius Mutie Mutua, Alex Kyalo Mutemi, Pascal Kiseli Basilo Mungui wakiorodheshwa kama walalamishi wanaoshtakiwa kama maafisa wa Aimi Ma Lukenya Society na East African Portland Cement Ltd, msajili mkuu wa Ardhi na Mwanasheria Mkuu wa Serikali. , mshitakiwa wa pili na wa tatu mtawalia.