Bisht: Fahamu vazi alilovalishwa Lionel Messi wakati akipokea Kombe la Dunia Qatar

Akiwa na umri wa miaka 35, Lionel Messi alifikia ndoto yake kubwa ya kimichezo: kuinua Kombe la Dunia. Alifanya hivyo baada ya kuipa Argentina talanta, pasi na mabao muhimu ili kutawazwa kuwa timu bora nchini Qatar 2022. Baada ya ushindi wa La Albiceleste kwa mikwaju ya penalti dhidi ya Ufaransa 3(4)-3(2), ulikuwa ni wakati wa kuwatunuku vikombe katika hafla iliyoongozwa na rais wa FIFA, Gianni Infantino, na Amiri wa Qatar, Tamim bin Hamad Al Thani. .

Enzo Fernandez alitunukiwa tuzo ya mchezaji bora kijana, wakati Emiliano Martínez alikuwa kipa bora na Messi mchezaji bora.

Na wakati ambao Waajentina wote walikuwa wakingojea ulifika: kutolewa kwa Kombe la Dunia kwa nahodha.

Hapo ndipo emir wa Qatar alipomvalisha Messi katika vazi jeusi na lenye mistari ya rangi ya dhahabu lililokuwa na uwazi. Na kwa vazi hili nyota huyo wa Argentina aliinua kombe hilo pamoja na wachezaji wenzake, akiingizwa kwenye picha ambayo itabaki kuchongwa katika historia ya Argentina na soka la dunia.

Bisht ni nini?

Bisht ni vazi refu lililotengenezwa kwa nyenzo nyepesi, iliyopambwa kwa dhahabu halisi ambayo huvaliwa juu ya kitambaa nyeupe.

Kimsingi huvaliwa katika eneo la Ghuba, ni vazi ambalo limevaliwa kwa karne nyingi wakati wa hafla maalum. Inatazamwa kama ishara ya kuthaminiwa na heshima na kwa kawaida huvaliwa na viongozi wakuu kama vile wanasiasa, masheikh na watu wengine wa hadhi ya juu.

Vazi hilo lina maana muhimu sana kwa Waqatari. "Ni vazi la hafla rasmi na hutumiwa kwa sherehe," Hassan Al Thawadi, katibu mkuu wa kamati ya maandalizi ya Kombe la Dunia la Qatar, aliambia BBC Sport. "Hii ilikuwa sherehe ya Messi," alisema, akiongeza kuwa kuweka bisht juu yake ilikuwa "fursa ya kuonyesha ulimwengu utamaduni wetu wa Kiarabu na Kiislamu."

Kawaida hutengenezwa kwa manyoya ya ngamia na pamba ya mbuzi, vazi hili limetumika kwa zaidi ya 2000.

Vazi hilo linaonyesha hadhi ya kifalme na uongozi wa juu wa kidini sio tu nchini Qatar lakini katika nchi zingine za Kiarabu, na pia huvaliwa katika hafla za sherehe kama sherehe za kitamaduni na harusi, ambapo baba humpa mwana kabla ya ndoa.

Mawaziri na viongozi wengine wa Qatar pia huvaa kwa Siku ya Kitaifa ya emirate, ambayo huadhimishwa kwa usahihi Jumapili hii, Desemba 18. Walakini, huko Qatar ni mtu mmoja tu anayeweza kuvaa kila wakati: Emir Al Thani, ambaye ndiye mamlaka kuu ya nchi.

Kwa hivyo, kumvisha Messi na bisht ilikuwa, kulingana na wachambuzi wengine, njia ya kumtambua kama mhusika mkuu katika uongozi wa soka. Haijulikani ikiwa ni kitendo cha hiari au kilichokubaliwa na FIFA, kinachojulikana kwa kubadilika kwake kidogo linapokuja suala la kuruhusu mikengeuko kutoka kwa itifaki. Kwa vyovyote vile, imezua udadisi mwingi na pia ukosoaji kutoka kwa wale wanaoamini kwamba kuvaa vazi la Kiarabu juu yake kumeharibu picha muhimu zaidi ya maisha ya Messi, sio tu kwa sababu ya aina hiyo ya vazi siyo ya kawaida, bali pia kwa sababu ilifunika kidogo ngao ya Argentina.