Afisa wa IEBC aliyemuidhinisha Sakaja hana uhakika wa uhalali wa digrii yake
•Gogo aliambia mahakama ya IEBC kwamba jukumu lake lilikuwa tu kuthibitisha ikiwa mgombeaji alitimiza matakwa yote kama ilivyoainishwa kisheria.
•Gogo aliitaka kamati hiyo kutohamishia mzigo wa uthibitisho kwa afisa anayesimamia uchaguzi wa kaunti
Image: TWITTER// JOHNSON SAKAJA
Afisa wa IEBC anayesimamia wa uchaguzi katika kaunti ya Nairobi Albert Gogo amesema haikuwa katika mamlaka yake kuthibitisha uhalali wa cheti kilichowasilishwa na mgombea ugavana Johnson Arthur Sakaja.
Akijitetea dhidi ya makosa yoyote, Gogo aliambia mahakama ya IEBC kwamba jukumu lake lilikuwa tu kuthibitisha ikiwa mgombeaji alitimiza matakwa yote kama ilivyoainishwa kisheria.
Kupitia wakili wake Moses Kipkogei, Gogo aliteta kuwa mzigo wa kuthibitisha madai ya ubatili wa cheti hicho uko kwa mlalamishi na haufai kuhamishwa.
"Jukumu la msimamizi wa kaunti katika mchakato wa uteuzi lilikuwa kupokea hati kutoka kwa wagombeaji lakini sio kwenda nje ya mamlaka yake ya kudhibitisha uhalali wa vyeti hivyo, kwa sababu hii inategemea upande wa mlalamishi," Kipkogei alisema.
"Ilikuwa ni wajibu kwa mlalamikaji kusafiri hadi Uganda na kuthibitisha uhalali wa cheti ikiwa kuna shaka."
Aliitaka kamati hiyo kutohamishia mzigo wa uthibitisho kwa afisa anayesimamia uchaguzi wa kaunti kama inavyodaiwa na wakili Paul Nyamodi anayemwakilisha mlalamishi Dennis Kaguu.
Aidha Gogo alieleza kuwa aliwafuta zaidi ya watahiniwa 20 kwa njia hiyo hiyo na kwamba vyeti alivyokabidhiwa ni halali na watahiniwa walikuwa na sifa za kupitishwa.
Aidha alidai kuwa uamuzi wa kesi hiyo umepangwa Juni 19, 2022.