Mwanamuziki wa nyimbo za injili Linet Munyali almaarufu Size 8 amefunguka kuhusu yale aliyopitia wakati alipoteza mtoto wake kabla ya kuzaliwa mapema mwezi uliopita.
Akiwa kwenye mahojiano na Chris Baraka hivi majuzi, Size 8 alisema aliishiwa nguvu na kuangua kilio kikubwa wakati alifahamishwa kuhusu kifo cha mtoto wake akiwa tumboni.
Mke huyo wa mcheza santuri Samuel Muraya almaarufu DJ Moh alisema wauguzi walimfahamisha kuwa maisha yake yalikuwa hatarini kutokana na shinikizo la damu.
"Nilipoambiwa eti moyo wa mtoto haudundi, nilianguka chini nikalia. Nililia, nikalia sana. Nilikuwa hata nashikiliwa na muuguzi. Waliniambia eti maisha yangu ndiyo yalikuwa hatarini juu ya shinikizo la damu" Alisema Size 8.
Baada ya kupoteza mtoto wake Size 8 aliomba aruhusiwe kuenda nyumbani ambako aliendeleza kilio huku akipiga sala kwa Mungu ili kuomba nguvu za kukabiliana na majonzi.
Alisema baada ya kujifungia katika chumba chake na kuomba kwa kipindi kirefu alikubali yaliyokuwa yametendeka na kuomba Maulana aweke maisha yake salama kwa ajili ya watoto wake.
"Nilijifungia kwa nyumba, nikalia mbele ya Mungu na baada ya hapo nikamwambia ni sawa. Nilimuomba Mungu aweke maisha yangu salama kwa ajili ya watoto wangu. Hiyo siku ata sikulala na bwanangu. Nililala na watoto wangu. Niliwakumbatia usiku wote nikiomba Mungu aniruhusu niendelee kuishi kwa ajili ya watoto wangu na nikaahidi kumpa maisha yangu afanye atakavyo" Alisimulia Size 8.
