Mulamwah amposti mzazi mwenzake Carol Sonnie kwa mara ya kwanza baada ya muda mrefu

Mchekeshaji mashuhuri David Oyando almaarufu Mulamwah amechapisha picha ya mzazi mwenzake Carol Sonnie kwa mara ya kwanza baada ya muda mrefu.

Siku ya Jumamosi, baba huyo wa mtoto mmoja alishiriki mabango mawili ya Sonnie kwenye ukurasa wake wa Instagram kwa madhumuni ya kutangaza shoo ya TV.

Sonnie ameratibiwa kuwa mgeni wa Diana Marua na Dr Ofeneke kwenye kipindi cha Mr Right Season 3 kwenye Rembo TV.

“Leo Usiku kwenye #HelloMrRight,” Mulamwah aliandika chini ya bango alizochapisha.

Ingawa chapisho hilo huenda lisiwe na maana kubwa, ni hatua ya kutatanisha ikizingatiwa uhusiano mbaya na drama zilizofuatia kusambaratika kwa mahusiano yao mwaka wa 2021. Pia inaweza kuashiria kuwa pengine uhusiano wa wazazi wenza hao wa sasa ni mzuri licha ya kurushiana maneno makali hapo awali.

Carol Sonnie amekuwa akiweka mahusiano yake siri huku Mulamwah akidaiwa kuchumbiana na rafiki yake Ruth K. Licha ya mara nyingi kuonekana wakijivijari pamoja kimahaba, wawili hao wamekuwa wakikanusha kuwa wapenzi.

Mapema mwaka huu, Mulamwah alibainisha kuwa uhusiano wake na 'bestie' wake Ruth K ni wa kirafiki tu.

Akizungumza na waandishi wa habari, mpenzi huyo wa zamani wa Carrol Sonnie aliweka wazi kuwa hakuna uhusiano wa kimapenzi kati yake na muigizaji huyo.

"Hakuna uhusiano ya kimapenzi kusema kweli. Namheshimu sana mpenzi wake. Ako na mpenzi," mchekeshaji huyo alisema.

Baba huyo wa binti mmoja alisema kwamba mpenzi wa Ruth ni rafiki yake mkubwa na hana tatizo lolote na urafiki wao.

Alifichua kwamba huwa anakutana mara kwa mara na mwanaume huyo na kushiriki mazungumzo ya kirafiki.

"Huwa tunakutana. Ni rafiki yangu. Hananga maneno, anaelewa hii biashara," alisema.

Katikati mwa mwaka jana, Sonnie alikuwa akijigamba kuhusu mahusiano mapya na kuonyesha  mpenzi wake mpya hadharani. Sonnie hata hivyo alikuwa akionyesha sehemu tu ya mpenziwe na kuficha sura yake.

"Niliamua na kusema wacha watu waone niko na furaha lakini wasione ni nani anafanya niwe na furaha. Hawahitaji kuona uso wake lakini niko na furaha sana," Sonnie alisema mwezi Agosti katika mahojiano na Nicholas Kioko.

Wakati huo, Muigizaji huyo alifichua kwamba  alikuwa amechumbiana na mpenziwe mpya kwa kipindi cha takriban miezi miwili.

Hata hivyo alidokeza kuwa yeye na  mpenzi huyo wake mpya wamekuwa marafiki kwa muda mrefu.

"Tumekuwa marafiki kwa zaidi ya miaka 10. Alikuwa nje ya nchi, alirudi miezi michache iliyopita," Alisema.