Mpenziwe Rihanna, A$AP Rocky kufikishwa mahakamani kwa kumpiga risasi rafiki yake wa utotoni

Rapa A$AP Rocky atafikishwa mahakamani kwa tuhuma za kufyatua bastola katika ugomvi na rafiki yake wa zamani wa utotoni, jaji wa Los Angeles ametoa uamuzi.

Uamuzi huo ulifanywa Jumatatu wakati wa siku ya pili ya usikilizwaji wa awali, ambao ulihudhuriwa na A$AP Rocky, jina halisi Rakim Mayers.

Waendesha mashtaka wanasema Bw Mayers, 35, alimnyooshea na kumfyatulia bunduki Terell Ephron miaka miwili iliyopita, na kusababisha majeraha madogo.

Bw Mayers, ambaye ana watoto wawili na mwimbaji Rihanna, amekana mashtaka.

Mayers aliyeteuliwa na Grammy, ambaye amekuwa na albamu mbili bora za Marekani, anakabiliwa na makosa mawili ya kushambulia kwa kutumia bunduki.

Anaweza kupokea hadi miaka tisa jela ikiwa atapatikana na hatia.

Bw Ephron, ambaye alikuwa sehemu ya kikundi cha muziki cha hip-hop cha A$AP Mob na anayemfahamu tangu wakati walipokuwa pamoja katika shule ya upili ya New York, anadai kando na kesi hiyo, yeye ni mwathirika wa kushambuliwa na kupigwa na kufadhaika kihisia.

Bw Ephron, anayejulikana kama A$AP Relli, anasema Bw Mayers "alimshawishi" kuwa nae eneo lisilojulikana nje ya Hoteli ya W huko Hollywood, Los Angeles, tarehe 6 Novemba 2021 ili kujadili kutoelewana.

Picha za CCTV za madai ya shambulio iliyochezwa mahakamani inaonyesha Bw Mayers akipiga risasi na kufyatua bunduki, mpelelezi wa LA alitoa ushahidi mapema mwezi huu.

Hata hivyo, mawakili wa Bw Mayers wanakanusha kuwa ni mteja wao anayeonekana kwenye video hiyo.