“Kuwa Mama Ni Kujifunza Kuhusu Nguvu Ambazo Hukujua Unazo” – Vera Sidika

Mwanasosholaiti Vera Sidika amewonyesha picha ya pamoja na wanawe waliokua na kufichua kwamba hakuna kitu chenye thamani zaidi katika maisha yake zaidi ya wanawe.

Mama huyo wa watroto wawili, Asia na Ice Brown alionyesha picha akiwa amefananisha mavazi na wanawe na kusema kwamba hajutii hata kidogo kuwa mama kwa malaika hao wawili.

Vera Sidika alisema kwamba kuwa mama ni hisia moja ya kipekee ambayo humpa mwanamke uwezo wa kugundua kuwa ana kipaji kingine cha nguvu za kipekee ambazo asingejua kuwa anazo kabla ya kuwa mama.

“Furaha yangu kuu; watoto wangu 😍🥹❤️ Kuwa mama ni kujifunza kuhusu nguvu ambazo hukujua kuwa nazo, na kukabiliana na woga ambao hukujua,” Vera Sidika aliandika.

Hii ni mara nyingine Sidika anaudhihirishia ulimwengu kuwa yeye ni mama bora kwa wanawe, kwani aghalabu huonekana akiwa mbioni kusafiri katika mataifa mbalimbali jambo linalozua maswali kuhusu muda wa kukaa karibu na wanawe.

Safari zake za mara kwa mara kwa kutumia ndege akizuru mataifa mbalimbali zimefanya baadhi kuibua maswali kuhusu Chanzo cha pesa zake, jambo ambalo Sidika alijibu kwamba yeye huvuna kutokana na kujivinjari tu.

Wakati wa kipindi cha Maswali na Majibu na wafuasi wake wa Instagram mnamo Ijumaa usiku Desemba 6, 2024, shabiki mmoja aliuliza sosholaiti swali hilo akilini mwa kila mtu:

“Unafanya kazi gani?”

Katika mtindo wake wa kawaida wa kujibu, Vera alijibu, "Mimi ni mtu wa kutulia sana," na kumwacha shabiki, na wengine wengi, bila maelezo ya kina ya jinsi anavyopata riziki yake.

Tangu kujipatia umaarufu kupitia kuonekana kwake katika tasnia ya burudani nchini Kenya, zikiwemo video za muziki na vipindi vya hali halisi kwenye televisheni, Vera ametambulika kote kwa utu wake wa ujasiri, mtindo wa kipekee wa mitindo na maisha ya kifahari.

Sosholaiti huyo ametumia vyema umaarufu wake, akibadilisha njia za mapato yake ili kujenga chapa inayodumisha maisha yake ya hali ya juu.

Vera Sidika amewekeza katika tasnia ya urembo, akimiliki chumba cha urembo na spa ambacho hutoa huduma kama vile matibabu ya ngozi, utunzaji wa nywele na uboreshaji mwingine wa urembo.