Jamaa ahukumiwa mwezi 1 jela kwa kunusa viatu vya jirani

Mahakama moja nchini Ugiriki, imemhukumu kifungo cha mwezi mmoja jela jamaa mmoja aliyedaiwa kuwakosesha jirani zake amani kwa kupenyeza mara kwa mara kwa boma lao na kunusa viatu.

Akiwa mbele ya korti ya Thessaloniki, jamaa huyo mwenye umri wa miaka 28 alishindwa kujitetea kwa kueleza tabia yake ya kunusa viatu vya jirani zake japokuwa alisema tabia hiyo imemtia aibu kubwa sana.

Mshukiwa huyo alikiri kuwa hakuwa na nia ya kuvunja sheria wala kumdhuru mtu yeyote katika kutekeleza kosa hilo la kuwakera jirani zake na kwamba hakufahamu ni kwa nini alikuwa anatekeleza kisa hicho.

Hata hivyo walalamishi waliiambia korti kuwa jamma huyo hakuonyesha ishara yoyote ya uchokozi wakati wa ziara zake za usiku katika boma lao.

Mshukiwa huyo alikamatwa na polisi akiwa mbele ya  nyumba ya mlalamishi akinusa viatu vilivyokuwa vimewachwa nje usiku mmoja baada ya mlalamishi kujulisha polisi kuhusu kisa hicho.

Mahakama ya Thessaloniki iliambiwa kuwa kulikuwepo visa zaidi ya mara tatu vya jamma huyo kukosesha jirani zake amani katika muda wa miezi sita iliyopita licha yawalalamishi kutoa taarifa kwa familia ya mshukiwa kutaka kumkomesha.

Tatizo hilo lilikadiriwa kumalizikia mahakamani baada ya walalamishi kukosa kupata suluhu kufuatia malalamishi yao kwa familia ya mshukiwa.

Hata hivyo, mshukiwa atatakiwa kuhudhuria vikao vya matibabu ilikupata ushauri nasaha wa kurekebisha tabia hiyo iliyomweka mashakani.