Octopizzo atofautiana na Seneta Edwin Sifuna kutetea makasisi wa kanisa Katoliki katika kuwajibisha serikali

Msanii Octopizzo ametofautiana na seneta wa Nairobi Edwin Sifuna  baada ya seneta huyo kutetea makasisi wa kanisa Katoliki katika kuwajibisha serikali ya rais William Ruto.

Seneta wa kaunti ya Nairobi Edwin Sifuna kwenye mtandao wa X ametetea muungano wa makasisi wa kanisa Katoliki waliotoa taarifa ya kukashifu utendakazi wa serikali.

Katika kumjibu seneta Sifuna, msanii Octopizzo ametofautiana na seneta huyo akisema kuwa kanisa Katoliki halikuzungumza wakati baadhi ya vijana wa kizazi cha Genz Z waliuliwa katika maandamano ya kupinga mswada wa fedha wa 2024 mwezi wa Juni.

Kwa mujibu wa Octopizzo, amewalaumu makasisi kwa kukosa uthabiti wa kuwajibisha serikali mara kwa mara akisema kuwa makasisi hao wanahisi kutengwa na sasa wana shauku ya kudai sehemu ya faida ambazo maaskofu wengine wanapokea.

Octopizzo ameongeza kusema kuwa watu wanatoroka makanisani kwa kuwa wanahisi kanisa limegeukia biashara kutoka kwa pahala patakatifu pa kiroho.

Kwa upande wake seneta Sifuna, Kanisa Katoliki limekuwa mstari wa mbele katika kukosoa utendakazi wa serikali likitoa taarifa ya mara kwa mara kuhusu vilio vya Wakenya katika mambo ambayo serikali inatekeleza inayoonekana kuwakandamiza.

Seneta Sifuna amesema kuwa ijapokuwa yeye si Mkristo mzuri Zaidi, wakati mwingine shetani humkalia mara kwa mara lakini licha ya hiyo anajivunia kuwa mshiriki wa kanisa Katoliki ambalo limekuwa imara kupinga matukio ambayo si ya haki nchini. Sifuna amesema kuwa makasisi wa kanisa Katoliki huwa wanazungumza mambo yanayomhusu hivyo basi naye pia atazungumza kwa ajili yao.

“Mimi si Mkristo mzuri, shetani hukanilia mara kwa mara lakini ninajivunia kanisa langu kwa sababu limekuwa thabiti kweny misimamo ya kweli. Maaskofu wanazungumza kwa ajili yangu. Nitazungumza kwa ajili yao.” Alisema Sifuna kwenye ukurasa wake wa X.

Hata hivyo, Octopizzo amekosoa seneta Sifuna kuwa mnamo tarehe 25 Juni wakati wa maandamano hawakuhitaji siku 4 kutoa taarifa wakati Zaidi ya watu 60 wailuawa.

“@edwinsifuna mnamo Juni 25 ilikuwa siku ambayo hawakustahili(makasisi) siku nne kutoa taarifa wakati watu zaidi ya 60 waliuliwa. Usitubebe ndogo.”  Octopizzo alimjibu seneta Sifuna.