Hawezi ata chaguliwa kama mwenyekiti wa josho kule Nyamira – Seneta Cherargei amwambia Matiang’i

Seneta wa kaunti ya Nandi Samson Cherargei amefutilia mbali nia ya aliyekuwa waziri wa mambo ya ndani Fred Matiang’I kuwania urais katika uchaguzi mkuu ujao wa mwaka 2027.

Kauli ya seneta Cherargei inajiri baada ya taarifa kusambaa kuwa waziri huyo wa zamani amekodi huduma ya waajuzi wa maswalaya uchaguzi waliohusika katika uchaguzi uliokamilika nchini Botswana ilikumsaidia katika azma yake ya kuwa rais katika uchaguzi mkuu ujao.

Kwa mujibu wa Cherargei, amemsuta Matiang’I akisema kuwa chini ya hatamu yake kama waziri katika utawala wa rais mstaafu Uhuru Kenyatta, visa vya mauaji ya kiholelela, mateso ya kisiasa na kupotea kwa watu kwa lazima kulitukia mno na ilikuwa ratiba ya kila siku.

Kwa mujibu wa gazeti moja la Kenya, Matiang’i ametia sahihi katika mkataba na kampuni iliyohusika pakubwa na ushindi wa Duma Boko katika uchaguzi wa Botswana uliofanyika Oktoba 30.

Seneta Cherargei amesema kuwa Fred Matiang’i hawezi kumbandua rais William Ruto  katika uchaguzi ujao akidai kuwa waziri huyo wa zamani hawezi ata kuchaguliwa kusimamia josho nyumbani kwao katika kaunti ya Nyamira.

“Nabashiri kuwa hawezi ata kuchaguliwa kama mwenyekiti wa josho mahali popote ndani ya Nyamira.”   Alisema Cherargei.

Seneta huyo pia amesema kuwa wakati wa Matiang’i kama waziri wa maswala ya ndani ndipo mili ya watu ilipatikana katika mbuga ya Tsavo na mto Yala.

Hata hivyo Matiang’i hajatangaza rasmi nia ya kuwania urais wa Kenya katika mwaka wa 2027.